Ármann Smári: Verð vonandi klár á fimmtudaginn

Ármann Smári Björnsson þurfti að fara af velli í sigri ÍA gegn Keflavík í gær vegna hálsmeiðsla. Hann er þó vongóður um að meiðslin séu ekki alvarleg.

Skagamenn unnu leikinn, 3-2, og tróna á toppi Pepsi-deildar karla með fullt hús stiga. „Ég er nokkuð stífur í hálsinum. Þetta situr allt fast eins og er," sagði hann við vísi í dag.

„Ég fór upp í skallabolta og fékk slink. Þetta festist bara allt saman. Maður hefði kannski átt að fara strax út af en ég reyndi eitthvað að þrjóskast áfram. En það þýddi ekki neitt," bætti hann við.

„Það er verið að vinna í því að koma þessu í lag og ég vona að þetta sé ekkert alvarlegt. Ég stefni alla vega að því að vera klár á fimmtudaginn - svona til að byrja með."

Skagamenn mæta Stjörnunni í Garðabænum á fimmtudagskvöldið.