Stórsókn gegn uppreisnarmönnum

Bandarískar og afganskar sveitir hafa hrundið af stað þremur viðamiklum aðgerðum í suður- og austurhluta Afganistans til þess að reyna að binda enda á árásir uppreisnarmanna í landinu og auka öryggi borgaranna. Frá þessu greindi Bandaríkjaher í dag. Herinn telur að baráttuþrek uppreisnarmanna úr röðum talibana og bandamanna þeirra sé að þverra og því var ákveðið að hefja stórsókn til þess að hrekja þá úr fylgsnum sínum. Ekki er gefið upp nákvæmlega hvar aðgerðirnar fara fram eða hversu margir hermenn taka þátt í þeim. Bandaríkjamenn hafa verið gagnrýndir fyrir að ganga heldur hart fram í leit sinni að herskáum uppreisnarmönnum og lýsti Hamid Karzai, forseti Afganistans, því yfir um helgina að hann vildi að afgönsk stjórnvöld yrðu höfð meira með í ráðum þegar skipuleggja ætti áhlaup á grunaða uppreisnarmenn.