Spáir stýrivaxtalækkun í nóvember

Greining Landsbankans spáir því að vaxtalækkunarferli Seðlabankans hefst í nóvember en ekki á fyrsta fjórðungi 2009, eins og greiningin gerði ráð fyrir áður.

Í spá greiningar um stýrivexti segir að verulega dragi úr verðbólguvæntingum á næstu mánuðum og hættan á víxlverkun launa og verðlags sé því minni en ella. Hratt dregur úr verðbólgu á seinni hluta árs og á næsta ári.

Greining reiknar með að spá Seðlabankans um atvinnuleysi á þessu ári gangi eftir, en það þýðir að atvinnulausum fjölgi um 2.000 fram að áramótum. Þessi þróun, ásamt skaplegri gengisþróun krónunnar og lækkun fasteignaverðs mun draga úr verðbólgu og verðbólguvæntingum.