Frábær endasprettur tryggði Watson sigur

Bubba Watson vann Northern Trust Open í annað sinn á þremur árum í gær.

Hann spilaði lokahringinn á 68 höggum og var einu höggi á undan Adam Scott og Jason Kokrak. Rory McIlroy missti algjörlega flugið á lokahringnum sem hann spilaði á 75 höggum.

Endaspretturinn hjá Watson var magnaður. Hann var tveim höggum á eftir Scott og Kokrak er fjórar holur voru eftir. Hann fékk fugl á tveimur af síðustu þrem holunum og tryggði sér sætan sigur.

Þetta var í níunda sinn sem Watson vinnur mót á PGA-mótaröðinni.