Ólafur: Hugarfar Eiðs Smára á æfingum sjaldan betra

Ólafur Jóhannsson, landsliðsþjálfari, hefur trú á að Ísland vinni Danmörku í fyrsta sinn í sögunni þegar að liðin mætast í undankeppni EM 2012 á morgun.

Ísland er með eitt stig í riðlinum eftir fjóra leiki en Ólafur hefur trú á sínum mönnum.

„Við höfum spilað Danina þrisvar sinnum á síðustu árum og ég tel okkur vita hvernig þetta lið spilar. Morten Olsen hefur þjálfað þetta lið í 10-11 ár og hefur haldið sig við sinn leikstíl,“ sagði Ólafur við Hörð Magnússon íþróttafréttamann en viðtalið í heild sinni má sjá hér fyrir ofan.

„Þeir hafa talað um hvað völlurinn okkar er lélegur og að þeir muni því breyta um sinn stíl en ég tel að það sé ekki rétt. Það er bara blekking.“

„En leikurinn snýst um okkur sjálfa, fyrst og fremst. Ég hef sagt strákunum að ég var mjög ósáttur við leikinn út á Kýpur því ég taldi að þegar við fórum þangað að við gætum unnið þann leik.“

„En því miður gerðist það ekki. Sóknaraðgerðir okkar voru aumar og lélegar en aftur á móti spiluðum við vel í vörninni. Ég vona að við getum aðeins bætt það í þetta skiptið. Þessir leikmenn spila í fínum félagsliðum sem þora að halda boltanum og af hverju ættum við ekki að geta gert það hér líka.“

„Ef okkur tekst sæmilega til á morgun og losnum úr þeir pressu sem Danirnir setja á okkur tel ég að við verðum í mjög góðum málum.“

Sumir segja að leikmennirnir skuldi þér og þjóðinni almennilegan leik?

„Það er nú þannig með þessa leikmenn að þeir hafa gefið allt sem þeir eiga í þessa leiki sem þeir hafa spilað undir minni stjórn. En það er rétt að hlutirnir hafa ekki fallið fyrir okkur, þrátt fyrir að við höfum spilað oft ágætlega. Okkur vantar úrslit og sérstaklega á móti stærri þjóðum. Það hefur ekki dottið með okkur hingað til. Við höfum lagt áherslu að halda áfram að vinna í því sem við höfum verið að gera. Vonandi tekst okkur vel til á morgun.“

Ólafur lofaði einnig hugarfar Eiðs Smára Guðjohnsen sem er aftur kominn í liðið eftir að hafa misst af leiknum gegn Kýpur.

„Ég býst við góðum leik frá honum eins og öllum öðrum leikmönnum. Það er mikið fagnaðarefni að fá hann aftur með okkur í hópinn. Hann hefur sýnt okkur á æfingum að hann er í mjög góðu standi og það sem meira er - hugarfar hans hefur sjaldan verið betra á æfingum en á þessum.“

„Hugarfarið er gott og hann er greinilega staðráðinn í að gera góða hluti.“

Ólafur neitar ekki að það sé orðið löngu tímabært að vinna Danina, sem aldrei hefur tekist áður hjá karlalandsliðinu.

„Jú, það yrði mjög gaman. Það er sú þjóð sem við viljum helst vinna og ég hef mjög góða tilfinningu fyrir leiknum á morgun. Ég hef trú á því að við vinnum á morgun.“