Borgaryfirvöldum til háborinnar skammar

Samkvæmt greinargerð með fjárhagsáætlun Reykjavíkurborgar fyrir fjárhagsárið 2011 eru verulegar breytingar á gjaldskrá leikskólasviðs lagðar til og munu þær að öllu óbreyttu taka gildi í upphafi næsta árs. Þessar breytingar fela í sér umtalsverða hækkun leikskólagjalda fyrir alla foreldra þar sem gert er ráð fyrir almennri hækkun um 5.35%. Allra verst mun þetta þó koma niður á þeim foreldrum þar sem annað þeirra stundar nám en hitt er útivinnandi því að auki við þessa almenna hækkun á gjaldskrá mun sérstakur námsmannaafsláttur í umræddum tilvikum verða afnumin með öllu.

Í þessum tillögum hafa borgaryfirvöld ákveðið að fara þá leið að leggja þyngstu byrðarnar á herðar stúdenta. Fyrir foreldra í þessari aðstöðu og með barn á smábarnaleikskóla mun hækkun á leikskólagjöldum nema hátt í 9.000 krónur á mánuði. Þá er aðeins reiknað með afnámi námsmannaafsláttarins en 5.35% almenn hækkun ekki tekin með. Þá er með þessari upphæð einungi gert ráð fyrir einu barni, en séu viðkomandi einstaklingar með fleiri en eitt barn á sínu framfæri þá hefur borgin í hyggju að skerða systkinaafslátt umtalsvert.

Greiðslubyrði fyrir foreldra, þar sem annað er í námi en hitt vinnu, með barn eldri en tveggja ára mun aukast um u.þ.b. 5.000 krónur sé aðeins tekið mið af námsmannaafslættinum. Þess ber að geta að afsláttur fyrir foreldra þar sem báðir eru námsmenn eða þeir eru einstæðir fellur ekki niður.

Í ofangreindum sparnaðaraðgerðum borgarinnar fyrir næsta fjárhagsár eru námsmenn teknir sérstaklega fyrir og beinlínis gerðir að skotmarki. Mun eðlilegra myndi t.d. teljast að dreifa byrðunum yfir stærri hóp í stað þess að svo lítill hópur einstaklingar tæki á sig stærsta skellinn og stórauka með þeim hætti greiðslubyrði þeirra umfram aðra í svipaðri stöðu. Námsmenn eru sá þjóðfélagshópur sem hefur einna minnst úr að moða og má síst af öllum við sviptingum í greiðslubyrði en þess má geta að grunnframfærsla LÍN er umtalsvert lægri en atvinnuleysisbætur. Ætti stefna borgaryfirvalda ekki þvert á móti að miða að því að standa vörð um hagsmuni þeirra sem verst eru staddir?

Benda verður á þá staðreynd í þessu samhengi að tiltölulega auðvelt er fyrir einstaklinga að skrá sig úr sambúð. Töluverð hætta er á því að foreldrar í umræddri stöðu muni grípa til þess örþrifaráðs að skrá sig úr sambúð til þess eins að ná endum saman. Það hefur aftur á móti þær afleiðingar í för með sér að Reykjavíkurborg stendur uppi með enn meiri kostnað en ella. Þetta er raunhæfur möguleiki og staðreynd sem borgaryfirvöld verða að taka inn í myndina.

Stúdentaráð HÍ hefur nú fundað með formanni menntaráðs Reykjavíkurborgar sem og sviðsstjóra leikskólasviðs borgarinnar. Að mati Stúdentaráðs komu ekki fram nein haldbær rök sem réttlætt geta þessa hagsmunaskerðingu. Stúdentaráði hefur sömuleiðis verið tjáð að þverpólitísk sátt ríki um málið innan borgarstjórnar og einungis eigi eftir að afgreiða tillögurnar að forminu til, en það verður gert á fundi borgarstjórnar næsta þriðjudag, þann 14. desember.

Um leið og Stúdentaráð hvetur alla stúdenta til að mæta á þennan opna fund borgarstjórnar klukkan 14.00 í dag þá krefjumst við þess að borgarstjóri sem og aðrir kjörnir borgarfulltrúar endurskoði tillögurnar með hagsmuni námsmanna að leiðarljósi. Það yrði borgaryfirvöldum til háborinnar skammar að seilast ofan í grunna vasa þessa afmarkaða hóps námsmanna og skerða kjör þeirra með þessum hætti !