Fagna sigri á nasismanum með fámennum athöfnum

Evrópuríkin fagna því í dag að sjötíu og fimm ár eru nú liðin síðan bandamenn í Seinni heimsstyrjöldinni samþykktu uppgjöf Þýskalands nasismans árið 1945. 

Í ljósi kórónuveirufaraldursins verður þó lítið um hátíðahöld en leiðtogar ríkjanna ætla margir hverjir að vera viðstaddir fámennar athafnir. Macron Frakklandsforseti mun þannig leggja blóm á leiði óþekkta hermannsins í París og Angela Merkel Þýskalandskanslari verður viðstödd minningarathöfn. 

Í Berlín hefur verið lýst yfir almennum frídegi, en það á þó aðeins við í höfuðborginni en ekki annars staðar í landinu. Í Bretlandi verður tveggja mínútna þögn og þar á eftir mun Elísabet Englandsdrottning flytja landsmönnum ávarp.