Kauphöllin skoðar hvort Eimskip átti að gefa afkomuviðvörun

Kauphöllin hefur nú til skoðunar hvort Eimskip hefði átt að gefa út afkomuviðvörun eða ekki vegna afskriftar á níu milljörðum króna í tengslum við kaupin á Innovate.

Þórður Friðjónsson, forstjóri kauphallarinnar, segir í samtali við Vísi eða málið sé í ákveðnu ferli hjá þeim. Spurning sé hvort útgefandinn, það er Eimskip, hafi brotið opinberar reglur kauphallarinnar um viðskipti en þessar reglur verða allir að undirskrifa sem skrá sig í kauphöllina.

Umrædd rannsókn er ekki í neinum tengslum við rannsókn Fjármálaeftirlitsins á sama máli.

Þórður segir að hann eigi von á niðurstöðu hjá kauphöllinni á næstu dögum. Aðspurður um hugsanleg viðurlög fari svo að Eimskip hafi gerst brotlegt gegn reglum kauphallarinnar segir Þórður að það geti verið allt frá athugasemdum til fjársekta.