Sólstrandarstrákarnir kældu topplið NBA-deildarinnar

Sex leikja sigurhrina Milwaukee Bucks tók enda í nótt er Miami Heat vann óvæntan sigur á liðinu. Þetta var aðeins níunda tap Bucks í vetur.

Þetta var liðssigur hjá Heat enda margir að leggja hönd á plóg. Jimmy Butler og Jae Crowder voru stigahæstir með 18 stig í liði Heat og Goran Dragic kom næstur með 15.

Brook Lopez var atkvæðamestur í liði Bucks með 21 stig en Giannis Antetokounmpo var með 13 stig og tók 15 fráköst.

NY Knicks vann óvæntan sigur á Houston Rockets þar sem nýliðinn RJ Barrett skoraði 27 stig fyrir Knicks og Julius Randle 16.

James Harden einu sinni sem oftar stigahæstur í liði Houston með 35 stig og hann gaf einnig 8 stoðsendingar. Russell Westbrook kom næstur með 24 stig.

Úrslit:

Cleveland-Utah  113-126

NY Knicks-Houston  125-123

Orlando-Portland  107-130

Atlanta-Memphis  88-127

Miami-Milwaukee  105-89

Chicago-Dallas  109-107

San Antonio-Indiana  111-116