Töldu sig hafa fundið sprengju í bandaríska þinghúsinu

Þinghúsið í Washington var rýmt í dag, annan daginn í röð, eftir að öryggisverðir fundu grunsamlegan böggul við gestamóttöku hússins.

Lögreglan í borginni staðfesti að verið væri að rannsaka málið en vildi ekki tjá sig frekar um málið. 

Vitni segir í samtali við Reuters-fréttastofuna að sprengjuleitardeild lögreglunnar hafi farið fyrir aðgerðunum.

Uppfært kl. 13:30:

Öryggisverðir hússins segjast í tölvupósti til starfsmanna hafa leitað af sér allan grun og að enga sprengju hafi verið að finna í pakkanum. Svæðið verði opnað á ný innan skamms.

Fréttir voru fluttar af því í gær að skothvellir hafi heyrst í gestamóttöku þinghússins og var starfsfólki og þingmönnum á staðnum skipað að koma sér í öruggt skjól og halda sig innandyra.

Síðar kom í ljós að maður á sjötugsaldri hafði dregið upp skotvopn en að lögreglumenn hafi skotið á hann áður en honum tókst að hleypa af skoti. Maðurinn var fluttur á bráðamóttöku og er ástand mannsins að sögn erlendra miðla stöðugt.

Hér að neðan má sjá myndband frá sjónarvotti af rýmingunni.

Someone left their bag outside the Capitol so we are all being forced to walk to street @wusa9 pic.twitter.com/X9kVpT0FHQ

— Nikki Burdine (@NikkiBurdine) March 29, 2016