Ancelotti ætlar að vinna titla með Everton

Carlo Ancelotti er nýr stjóri enska úrvalsdeildarliðsins Everton og hann ætlar sér stóra hluti með félaginu.

Ancelotti er einn af sigursælustu þjálfurum þessarar aldar í evrópskum fótbolta; hefur unnið ensku úrvalsdeildina, ítölsku úrvalsdeildina, frönsku úrvalsdeildina og þýsku úrvalsdeildina auk þess að vinna Meistaradeild Evrópu í þrígang svo fátt eitt sé nefnt.

Everton hins vegar hefur ekkert unnið á þessari öld en síðasti titill félagsins vannst árið 1995 þegar Everton vann enska bikarinn.

Ancelotti ætlar sér að halda uppteknum hætti í titlasöfnun.

„Þetta er frábært félag ríkt af sögu og mjög ástríðufullum stuðningsmönnum. Eigendur og stjórn hafa skýra sýn og hún miðar að því að liðið verði sigursælt og vinni titla. Það er eitthvað sem ég vil gera sem knattspyrnustjóri og ég er spenntur fyrir því að ná þessum markmiðum,“ segir Ancelotti.

Everton goðsögnin Duncan Ferguson stýrði liðinu á meðan verið var að ganga frá samningi Ancelotti og var taplaus í þremur leikjum í ensku úrvalsdeildinni. Hann mun halda áfram að starfa fyrir Everton.

„Á frammistöðu leikmanna á síðustu tveimur vikum hef ég séð að þeir geta náð miklum árangri. Duncan á hrós skilið fyrir sitt framlag. Gott skipulag og agi eru lykilatriði í fótbolta og ég er ánægður með að hann verði í þjálfarateyminu mínu,“ segir Ancelotti.