Matur

Aðventumolar Árna í Árdal: Karamella

Sylvía Rut Sigfúsdóttir skrifar
Árni Ólafur úr Hinu blómlega búi mun koma öllum í rétta hátíðarskapið og reiða fram einn rétt á dag fram að jólum.
Árni Ólafur úr Hinu blómlega búi mun koma öllum í rétta hátíðarskapið og reiða fram einn rétt á dag fram að jólum. Vísir/Árni

Á hverjum degi fram að jólum birtum við uppskrift frá Aðventumolum Árna í Árdal sem sýndir eru á Stöð 2 í desember. Árni Ólafur úr Hinu blómlega búi mun koma öllum í rétta hátíðarskapið og reiða fram einn rétt á dag fram að jólum.  Með einskærri lífsgleði og eldmóð hefur Árni sérstakan hæfileika til að hrífa fólk með sér.



Hér nær hann svo sannarlega að veita áhorfendum innblástur og töfrar fram bragðgóða og spennandi rétti alla aðventuna. Karamella er uppskrift dagsins. Aðventumolann má sjá hér í spilaranum að neðan en uppskrift og leiðbeiningar er að finna neðar í fréttinni. Aðventumolar Árna í Árdal eru á dagskrá Stöðvar 2 klukkan 19.10 alla daga fram að jólum nema á föstudögum eru þeir sýndir beint á eftir Allir geta dansað.  

Klippa: Karamella - Aðventumolar Árna í Árdal

Það er einn réttur sem marga kvíðir að gera um jólin og allir eru með skoðun á því hvernig best er að laga, en það eru brúnaðar kartöflur. Sjálfur hef ég let í því korter í mat á aðfangadag að karamellan kristallast og hleypur í kekki, eitthvað sem enginn vill lenda í. Það sem ég geri núna, hins vegar, er að laga karamelluna nokkrum dögum áður og þónokkru magni því ég get nýtt hana á ýmsa vegu yfir hátíðirnar. Ekki sleppa vínsteininum (e. cream of tartar) í karamellugrunninum því hann kemur í veg fyrir karamellan kristallist.

Innihald

Karamellugrunnur

400 grömm sykur

200 millilítrar vatn

¼ teskeið vínsteinn

Karamellusósa

1 karamellugrunnur

250 millilítrar rjómi

½ teskeið salt

1 teskeið vanillufræ eða dropar

50 millilítrar bourbon (má sleppa)

Brúnaðar kartöflur

100 grömm karamellugrunnur

30 grömm smjör

1 kíló kaldar skrældar forsoðnar kartöflur

Piparkökukaramellupopp

3 lítrar popp (um 100 gröm af poppmaís)

300 grömm karamellugrunnur

100 grömm smjör

1 teskeið malaður kanill

1 teskeið malað engifer

¼ teskeið malaðir negulnaglar

½ teskeið salt

½ teskeið matarsódi

Tvær lúkur af góðum piparkökum

Leiðbeiningar

  1. Karamellugrunnur - Blandið saman sykri, 100 millilítrum og vínsteini í þykkbotna potti. Hitið sykursírópið yfir háu hita þar til það byrjar að dökkna. Lækkið þá undir pottinum niður í miðlungshita. Notið hitamæli til að mæla karamelluna af og til. Takið pottinn af hellunni þegar karamellan nær 170°C og hellið afganginum af vatninu út í. Passið ykkur því karamellan freyðir illilega þegar vatnið fer út í. Hrærið í karamellunni og hellið henni síðan í stóra krukku og setjið lok á.

  2. Karamellusósa - Hitið karamellugrunninn í miðlungsstórum þykkbotna potti yfir miðlungshita þar til hann hefur náð 180°C. Takið pottinn af hitanum og bætið rjómanum út í og hrærið þar til hættir að freyða. Bæti við salti, vanillufræjum og bourbon og hrærið vel. Látið sósuna kólna ögn áður en hún er borin fram en ef á að geyma hana þá er hún sett beint á krukku.

  3. Brúnaðar kartöflur - Hitið karamellugrunninn á stórri pönnu yfir miðlungsháum hita þar til hann er orðinn dökkgullinn. Bræðið smjörið þá í karamellunni og bætið köldum kartöflunum saman við. Veltið kartöflunum um í karamellunni í um 10 mínútur eða þar til þær eru heitar í gegn. Berið strax fram.

  4. Karamellupopp - Smyrjið stóra hitaþolna skál og stóra ofnplötu með olíu. Setjið poppið í skálina. Hitið karamellugrunninn í miðlungsstórum þykkbotna potti yfir miðlungshita þar til hann hefur náð 180°C. Takið pottinn af hitanum og bætið við smjöri, kanil, engiferi, negul, salti og matarsóda en þá byrjar blandað freyða nokkuð vel. Hrærið rösklega í pottinum og hellið síðan heitri karamellunni í skálina með poppinu. Hrærið snögglega og rösklega í poppinu og passið ykkur á því að karamellan er sjóðheit og skálin gæti verið það líka! Hellið poppinu á bökunarplötuna og dreifið úr því. Myljið piparkökurnar yfir poppið og látið það kólna í um 15 mínútur áður en það brotið í sundur. Geymið í loftþéttu í láti.

Tengd skjöl


Tengdar fréttir




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.