Erlent

Mannskæð skotárás í kirkju í Búrkína Fasó

Vésteinn Örn Pétursson skrifar
Hryðjuverkaárásum í Búrkína Fasó hefur fjölgað á síðustu árum. Þessi mynd var tekin eftir eina slíka, árið 2016.
Hryðjuverkaárásum í Búrkína Fasó hefur fjölgað á síðustu árum. Þessi mynd var tekin eftir eina slíka, árið 2016. Vísir/Getty
Minnst 14 eru látin eftir skotárás í kirkju í þorpinu Hantoukoura í austurhluta Búrkína Fasó í dag.

Í yfirlýsingu frá stjórnvöldum á svæðinu kemur fram að fjöldi manna sé særður eftir árásina.

Ekki liggur fyrir hverjir standa að árásinni. Eins er ástæða hennar óljós. Hundruð manna hafa fallið í svipuðum árásum í landinu á síðustu árum. Flestar þeirra hafa verið framdar af öfgatrúuðum hryðjuverkasamtökum. Árásirnar hafa valdið mikilli spennu milli ólíkra þjóðfélags- og trúarhópa, sérstaklega við landamæri Búrkína Fasó við Malí.

Í frétt breska ríkisútvarpsins af málinu er vitnað í heimildamann AFP-fréttastofunnar, sem segir að vopnaðir menn hafi komið inn í kirkjuna og byrjað að skjóta. Þeir hafi meðal annars skotið prest og börn sem í kirkjunni voru.

Haft er eftir öðrum heimildamanni að mennirnir hafi flúið vettvang á vespum.

Mannskæðar árásir öfgafullra íslamista hafa gerst æ tíðari í Búrkína Fasó síðan 2015, en ein afleiðing þess er að loka hefur þurft þúsundum skóla.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.