Erlent

Segist hafa verið beðin um að segja ekki frá nauðgun þar sem slíkt kæmi föður sínum illa

Atli Ísleifsson skrifar
Bob Hawke er einn af risunum í ástralskri stjórnmálasögu.
Bob Hawke er einn af risunum í ástralskri stjórnmálasögu. Getty

Dóttir Bob Hawke, fyrrverandi forsætisráðherra Ástralíu, segir að sér hafi verið nauðgað snemma á níunda áratugnum en að hún hafi verið beðin um að þegja þunnu hljóði til að koma í veg fyrir að skaða ekki stjórnmálaferil föður síns.

Ásakanir Rosslyn Dillon koma fram í réttargögnum sem ástralska síðan New Daily hefur komist yfir. Segir hún að Bill Landeryou, fyrrverandi þingmaður og samflokksmaður Hawke, hafi nauðgað sér. Bæði Hawke og Landeryou eru nú látnir.

Í frétt BBC segir að hin 59 ára Dillon sæki nú fjórar milljónir ástralskra dala í dánarbú föður síns, um 270 milljónir íslenskra króna. Segir í gögnunum að Dillon segi Landeryou hafa nauðgað sér árið 1983, á þeim tíma er hún starfaði á skrifstofu þingmannsins og Hawke sóttist eftir því að verða leiðtogi ástralska Verkamannaflokksins.

Dillon segir að hún hafi þrívegis orðið fyrir kynferðisofbeldi. Eftir þriðja atvikið hafi hún rætt málið við föður sinn og að hún hugðist leita með málið til lögreglu. Þá eigi Hawke að hafa sagt: „Það getur þú ekki gert. Ég get ekki verið með nein deilumál núna. Mér þykir það leitt en ég sækist nú eftir því að leiða Verkamannaflokkinn.“

Fjölskyldan meðvituð

Sue Pieters-Hawke, systir Rosslyn Dillon, segir fjölskylduna hafa verið meðvitaða um ásakanirnar á þeim tíma. „Hún sagði fólki frá þessu á sínum tíma. Ég tel að viðbrögðin hafi verið stuðningsrík en það fól ekki í sér að leitað var til réttarkerfisins,“ segir Pieters-Hawke.

Landeryou var þingmaður á árunum 1976 til 1992 og eru þeir Hawke sagðir hafa átt í góðum samskiptum í forsætisráðherratíð Hawke, frá 1983 til 1991.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.