Innlent

Alþjóðlegasta samfélag á landinu er Vík í Mýrdal

Kristján Már Unnarsson skrifar
Þorbjörg Gísladóttir, sveitarstjóri Mýrdalshrepps.
Þorbjörg Gísladóttir, sveitarstjóri Mýrdalshrepps. Stöð 2/Einar Árnason.

Vík í Mýrdal er orðin alþjóðlegasta þorp landsins en fjörutíu prósent íbúanna eru núna erlendir ríkisborgarar. Rótgrónir Mýrdælingar segja þetta jákvæða breytingu, samfélagið sé orðið opnara og menningarlíf hafi aukist. Þetta kom fram í fréttum Stöðvar 2 og í þættinum „Um land allt“

Hvergi á landinu fjölgar íbúum eins hratt og í Mýrdalshreppi. Fjölgunin nemur fimmtíu prósentum á síðustu sex árum.

Séð yfir Vík í Mýrdal. Efst til vinstri sést í Mýrdalsjökul með eldstöðina Kötlu. Stöð 2/Einar Árnason.

„Ég held að okkur hafi fjölgað um ellefu prósent á síðasta ári. Ég held að það sé bara landsmet,“ segir Þorbjörg Gísladóttir, sveitarstjóri Mýrdalshrepps. 

Af nærri sjöhundruð íbúum hreppsins eru um 280 með erlent ríkisfang.

Horft til Reynisdranga. Víkurskóli fyrir miðri mynd. Stöð 2/Einar Árnason.

Hótelhaldarinn Elías Guðmundsson er með 115 starfsmenn og nær eingöngu útlendinga. 

„Það er ekkert af því að maður vill ekki vera með Íslendinga. En maður auglýsir eftir starfsfólki. Það sækir enginn Íslendingur um,“ segir Elías.

Elías Guðmundsson, hótel- og veitingahúsaeigandi í Vík. Stöð 2/Egill Aðalsteinsson.

Rótgrónum Mýrdælingum finnst breytingin á litla sveitaþorpinu ekki slæm, eftir því sem við heyrðum í kaffispjalli við karlahóp sem kallar sig öldungaráðið. 

„Þetta er orðið mjög mikið alþjóðlegt samfélag. Það er gríðarlega mikið af erlendu fólki sem er sest hérna að og er mjög gott fólk,“ segir einn „öldunganna“, Birgir Hinriksson, fyrrverandi mjólkurbílstjóri.

Frá kaffispjalli öldungaráðsins. Reynir Ragnarsson, fyrrverandi lögreglumaður, og Birgir Hinriksson, fyrrverandi mjólkurbílstjóri. Stöð 2/Einar Árnason.

Veitingastöðum og gististöðum hefur snarfjölgað en einnig afþreyingarmöguleikum. 

„Þetta er komið frá því að vera bara lítið samfélag, með bara innfæddum, yfir í stórt samfélag, með fólki frá öllum heimshornum. Og það er komin rosamikil menning hérna. Við erum með rosalega fjölbreytt menningarstarf,“ segir Daníel Óliver Sveinsson, eigandi eins af mörgum nýjum veitingastöðum hreppsins.

Daníel Óliver Sveinsson, veitingahúsaeigandi í Vík. Stöð 2/Einar Árnason.

„Hér væri ekkert ef ferðamaðurinn hefði ekki komið. Ég efast um að það væri hér skóli eða verslun. Ég hugsa að þetta væri allt farið,“ segir Birgir í hópi öldunganna. 

„Það væri illa farið,“ heyrist okkur Finnur Bjarnason bifvélavirki bæta við.

„Þetta væri eins og Borðeyri,“ segir Jóhannes Kristjánsson, fyrrverandi bóndi á Höfðabrekku.

Frá veitingastaðnum The Soup Company. Stöð 2/Einar Árnason.

„Mér finnst heimamenn vera orðnir miklu opnari en þeir voru áður. Og fólk talar meira saman. Bæði eru útlendingarnir að reyna að læra íslensku, margir. Það eru íslenskunámskeið í boði. Og svo erum við líka að verða betri í ensku,“ segir Daníel Óliver. 

-Er erfitt að fá Íslendinga til þess að flytja hingað? 

„Já, það verður bara að segjast eins og er. Eins og tækifærin eru mörg, þá hefur það ekki gengið nógu vel,“ svarar Þorbjörg sveitarstjóri. 

„Og ég bara skora á landsmenn að koma til Víkur,“ segir hún.

Haldið verður áfram að fjalla um Mýrdalshrepp í næsta þætti „Um land allt“ á Stöð 2 næstkomandi mánudagskvöld.

Hér má sjá frétt Stöðvar 2:


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.