Innlent

Undrast að sjá sovéska hertrukka og Antonov flugvél í Vík í Mýrdal

Kristján Már Unnarsson skrifar
Gísli Daníel Reynisson, eigandi hertrukkanna og flugvélarinnar.
Gísli Daníel Reynisson, eigandi hertrukkanna og flugvélarinnar. Stöð 2/Einar Árnason.

Sovéskir hertrukkar og Antonov-flugvél vekja furðu meðal ferðamanna sem leið eiga um Vík í Mýrdal. Þessi gömlu kaldastríðstól hafa þó ekkert með ferðamennsku að gera heldur gegna allt öðru hlutverki, eins og fram kom í fréttum Stöðvar 2. 

Fæstir eiga von á því að rekast á hertól þegar þeir aka um þetta friðsæla sveitaþorp en trukkarnir eru vinsælt myndefni ferðamanna.

Hertrukkarnir eru vinsælt myndefni í Vík. Stöð 2/Einar Árnason.

„Já, já. Þeir eru mikið myndaðir. Það er verið að mynda hér alla daga,“ segir Gísli D. Reynisson, eigandi hertrukkanna. 

Þeir eru ættaðir úr gömlu Sovétríkjunum, gamlir kaldastríðstrukkar, auk eins af Benz-gerð. 

„Fyrstu tvo fluttum við inn frá Austur-Þýskalandi þegar Rússarnir fóru heim þegar Múrinn féll,“ segir Gísli.

Trukkarnir fengust frá Austur-Þýskalandi eftir lok kalda stríðsins. Stöð 2/Einar Árnason.

Jafnframt fengu þeir aðra tvo, sem notaðir voru sem leikmunir í kvikmyndinni Fast and Furious, en til stóð að farga.  

Og sá er einmitt tilgangur Gísla með að halda í trukkana; að nýta þá við kvikmyndatökur.

Eigandinn nýtir trukkana í kvikmyndaverkefni hérlendis. Stöð 2/Einar Árnason.

„Ég hef bara lengi starfað svona aðeins með kvikmyndafólki og hef nýtt þá í ýmis kvikmyndaverkefni, bæði sem leikmynd og sérstaklega ef það er verið að mynda á jöklum, þá eru þetta alveg sérstaklega góð tæki, þú getur keyrt um alla jökla á orginal óbreyttum bílum.“ 

En hér er líka eldgömul sovésk flugvél, sundurtekin undir húsvegg, af gerðinni Antonov AN 2.

Úr flugstjórnarklefa Antonov-flugvélarinnar í Vík. Stöð 2/Einar Árnason.

„Það átti líka að farga henni. Þannig að mér tókst svona á síðustu stundu að forða því.“ 

-En ekki ætlarðu að fljúga henni hérna í Vík eða hvað? 

„Nei, nei. Það er búið að eyðileggja hana. En hún var flughæf bara fyrir þremur árum síðan. En það er náttúrlega bara alveg búið að eyðileggja hana núna. En hún gæti nýst sem leikmynd.“

Úr farþegaklefanum. Þessi stærsta tvíþekja heims getur borið allt að fjórtán farþega. Stöð 2/Einar Árnason.

Og Antonov-flugvélin er líka kvikmyndastjarna, var notuð í kvikmyndinni Arctic með danska leikaranum Mads Mikkelsen og íslensku leikkonunni Maríu Thelmu Smáradóttur. 

„Þetta er stærsta tvíþekja sem hefur verið framleidd, fjórtán sæta vél, einshreyfils, og vél sem átti heimsmet í því að vera lengst í framleiðslu. Hún var framleidd, að ég held, í 57 ár,“ segir Gísli Daníel Reynisson. 

Hér má sjá frétt Stöðvar 2:


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.