Innlent

Sáu líkams­á­rás „nánast út um kaffi­stofu­gluggann“ á lög­reglu­stöðinni

Stefán Ó. Jónsson skrifar
Árásin átti sér stað skammt frá lögreglustöð 2, sem stendur við Flatahraun í Hafnarfirði.
Árásin átti sér stað skammt frá lögreglustöð 2, sem stendur við Flatahraun í Hafnarfirði. Vísir/vilhelm

Karlmaður var handtekinn í Flatahrauni í Hafnarfirði í hádeginu í gær eftir að hafa ráðist á ökumann bifreiðar, sem hann taldi hafa ekið í veg fyrir sig. Árásin átti sér stað um 30 metra frá lögreglustöðinni við Flatahraun 11 og voru lögreglumenn því ekki lengi á vettvang - „við sáum þetta nánast út um kaffistofugluggann hjá okkur,“ eins og lögregluþjónn á lögreglustöð 2 orðaði það í samtali við Vísi.

Að sögn vitnis rauk árásarmaðurinn að bíl fyrir framan sig og barði í rúðuna, reif síðan upp hurðina og sló ökumann nokkrum höggum í andlitið áður en hann dró ökumanninn út úr bílnum. Fjölskylda ökumannsins var í bílnum, eiginkona hans og ungur sonur.

Vitnið segir árásarmanninn hafa öskrað á ökumanninn að hann hafi „svínað á sig,“ áður en hann lét höggin dynja. Þau sem urðu vitni að atburðarásinni segja þá ásökun þó ekki halda vatni.

Sem fyrr segir var lögreglan fljót að ganga á milli og handtaka árásarmanninn sem var fluttur á lögreglustöðina. Ekki var talið tilefni til að fara fram á gæsluvarðhald yfir manninum og fékk hann því að halda heim að lokinni skýrslutöku.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.