Formúla 1

Uppgjör: Hamfarir Vettel tryggðu Hamilton sigur

Bragi Þórðarson skrifar
Hamilton kom fyrstur í mark í 82. skiptið á ferlinum í Rússlandi um helgina.
Hamilton kom fyrstur í mark í 82. skiptið á ferlinum í Rússlandi um helgina. Getty

Lewis Hamilton tryggði sér sinn níunda sigur á tímabilinu er hann kom fyrstur í mark í rússneska kappakstrinum um helgina.

Liðsfélagi hans, Valtteri Bottas, kom annar í mark og var það í áttunda skiptið á tímabilinu sem Mercedes bílarnir enda í fyrsta og öðru sæti.

Úrslitin voru ansi óvænt þar sem Ferrari ökumennirnir Charles Lecerc og Sebastian Vettel ræstu í fyrsta og þriðja sæti. Eftir fyrstu beygju voru þeir þó komnir í fyrsta og annað og var það Vettel sem leiddi.
 

Ferrari ökuþórarnir börðust um fyrsta sætið í fyrstu beygju. Getty

Ferrari í vandræðum með ökumennina

Taktík Ferrari liðsins var að leyfa Vettel að elta Leclerc á langa beina kaflanum fyrir fyrstu beygju og fyrir vikið fá meiri hraða til að taka fram úr Hamilton sem ræsti annar. Þetta virkaði svo vel að Þjóðverjinn komst bæði framúr Hamilton og unga liðsfélaga sínum.

Nokkrum hringjum seinna bað liðið Sebastian um að hleypa Leclerc framúr eins og talað hefði verið um fyrir keppni. Rétt eins og Vettel hefur margoft gert á sínum ferli neitaði hann þessari skipun liðsins margsinnis.

Ferrari nýtti sér þjónustuhléin til að koma Leclerc fram fyrir Vettel. Báðir Ferrari bílarnir þurftu að koma inná þjónustusvæðið á undan Mercedes bílunum þar sem þeir byrjuðu á mýkri dekkjum.
 

Eftirleikurinn var auðveldur fyrir Mercedes eftir að Vettel datt úr leik. Getty

Mercedes fékk sigurinn á silfurfati

Stuttu eftir dekkjastoppið fann Vettel fyrir aflleysi í Ferrari bifreið sinni. Kom á daginn að rafmagnsmótor bílsins var bilaður og varð hann frá að hverfa úti á brautinni.

Fyrir vikið var kallaður út hermiöryggisbíll, sem þýðir að allir bílar verða að hægja á sér um 30 prósent.

Það þýðir að ökumaður tapar minni tíma við það að fara inn á þjónustusvæðið. Þetta nýtti Mercedes sér og kallaði bæði Hamilton og Bottas inn í dekkjaskipti.

Eftirleikurinn var auðveldur og komu þeir í mark í fyrsta og öðru sæti, þó Leclerc reyndi allt hvað hann gat til að komast framúr Bottas á lokahringjunum. Að lokum varð Mónakó búinn að sætta sig við þriðja sætið.

Úrslitin þýða að Hamilton er nú kominn með 73 stiga forskot í keppni ökuþóra og Mercedes er aftur komið með rúmlega 150 stiga forskot í keppni bílasmiða.
 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.