Myndavélar staðsettar utan á Alþjóðlegu geimstöðinni náðu ótrúlegu myndbandi fyrr í dag utan úr geimnum sem sýnir umfang fellibylsins Dorian sem hefur nú gengið á land á Bahamaeyjum. Dorian er skilgreindur sem fimmta stigs fellibylur og er um að ræða sterkustu vinda sem mælst hafa á norðvesturhluta Bahamaeyja.

Sjá einnig: Dorian orðin fimmta stigs fellibylur

Búið er að rýma svæðin á þeirri leið sem áætlað er að fellibylurinn fari yfir. Hámarksvindhraði Dorian náði 260 kílómetrum á klukkustund í dag en fimmta stiginu er náð þegar hámarksvindhraði fer yfir 252 kílómetra á klukkustund. Íbúar hafa verið varaðir við því að fellibylurinn sé gífurlega hættulegur.

Cameras outside the station captured views of #HurricaneDorian at 12:16 p.m. ET on Sept. 1 as it churned over the northern Bahamas. The storm is a dangerous Category 5 hurricane, carrying the strongest winds in recorded history for the northwestern Bahamas. #Hurricane #Dorian pic.twitter.com/ug0sdD5JOj

— Intl. Space Station (@Space_Station) September 1, 2019

Nýjustu spár benda til þess að strendur Flórídaríkis sleppi undan eyðileggingu stormsins en lítið þarf þó til þess að bylurinn rati á strendur Flórída á þriðjudag eða miðvikudag.

Dorian stefnir í að vera hættulegasti fellibylurinn sem nær landi í Bandaríkjunum síðan fellibylurinn Andrew reið yfir árið 1992. Ríkisstjóri Flórída, Rob DeSantis, lýsti á dögunum yfir neyðarástandi í Flórída en íbúar ríkisins hafa undanfarna daga verið að birgja sig upp af matvælum, vatni og lyfjum.