Uppgjör: Leclerc tileinkaði Anthoine sigurinn

Þrettánda umferðin í Formúlu 1 fór fram á Spa brautinni í Belgíu um helgina. Dauði unga ökumannsins Anthoine Hubert setti sorgarsvip á annars líflegan kappakstur. Hubert lést í Formúlu 2 keppni á brautinni daginn fyrir Formúlu 1 kappaksturinn.

Charles Leclerc, sem byrjaði á ráspól í þriðja skiptið á ferlinum, stóð uppi sem sigurvegari á sunnudaginn. Sigurinn var hans fyrsti á ferlinum auk þess að vera fyrsti sigur Ferrari á árinu.

,,Mig langar að tileinka Anthoine sigurinn, þegar ég var að byrja í Go-Kart var ég að keppa með með honum og vorum við góðir vinir´´ sagði Leclerc sem er einnig fyrsti Mónakóbúinn til að vinna keppni í Formúlu 1.

Liðsfélagi Leclerc, fjórfaldi heimsmeistarinn Sebastian Vettel, komst aldrei nálægt unga liðsfélaga sínum og endaði að lokum fjórði á eftir báðum Mercedes bílunum.

Lewis Hamilton kom annar í mark, aðeins 0,9 sekúndum á eftir Leclerc. Það tók Bretann alls fjóra hringi að taka fram úr Vettel og tapaði hann við það dýrmætum sekúndum. Charles þakkaði því liðsfélaga sínum kærlega fyrir hjálpina að keppni lokinni.

Hamilton jók forskotið í heimsmeistaramótinu

Valtteri Bottas er annar í mótinu en endaði þriðji um helgina. Hamilton jók því forskot sitt í heimsmeistarakeppninni í 65 stig.

Þrátt fyrir að báðir bílar Ferrari liðsins byrjuðu á fremstu röð tókst liðinu ekki að klára í fyrsta og öðru sæti. Mercedes hefur oftar endað í fyrsta og öðru sæti á þessu ári heldur en Ferrari hefur gert á þessum áratug.

Ferrari og Mercedes voru í algjörum sérflokki á Spa brautinni. Nýji Red Bull ökuþórinn Alexander Albon kom fimmti í mark en liðsfélagi hans, Max Verstappen, varð frá að hverfa strax á fyrsta hring eftir samstuð við Kimi Raikkonen.

Allt leit út fyrir að hinn 19 ára gamli Lando Norris, ökumaður McLaren, myndi ná sínum besta árangri í Formúlu 1 er hann sat í fimmta sæti þegar einn hringur var eftir. Þá gripu máttarvöldin í taumanna og stöðvaðist McLaren bíll hans með vélarbilun.

Formúlan heldur áfram um næstu helgi þegar ekið verður á Monza brautinni í Ítalíu, heimavelli Ferrari.