Innlent

Rigningin litlu minni en í „hamfaraúrkomu“ árið 2015

Kristín Ólafsdóttir skrifar
Frá Siglufirði fyrr í sumar, þegar veður var ívið betra.
Frá Siglufirði fyrr í sumar, þegar veður var ívið betra. Vísir/vilhelm

Hin mikla úrkoma í Fjallabyggð og víðar um norðanvert landið síðustu daga var litlu minni en „hamfaraúrkoma“ sem varð í ágúst 2015, og náði þá yfir lengra tímabil, að því er fram kemur í tilkynningu frá Fjallabyggð. Tilkynnt hefur verið um leka í fimm húsum í sveitarfélaginu.

Mikið hefur rignt fyrir norðan undanfarna sólarhringa og búist er við áframhaldandi rigningu á svæðinu næstu daga. Á vef Veðurstofunnar segir þó að svo virðist sem draga eigi úr úrkomunni í lok vikunnar.

Gunnar I. Birgisson bæjarstjóri Fjallabyggðar og Ármann Viðar Sigurðsson deildarstjóri tæknideildar Fjallabyggðar benda á að sveitarfélagið hafi markvisst unnið að því síðustu ár að endurbæta holræsakerfið í báðum byggðakjörnum, bæði með tilliti til mengunar- og umhverfismála og flóða og úrkomu. Þessar úrbætur hafi komið í veg fyrir að verr hefði farið.

„Ef framangreint hefði ekki verið framkvæmt hefðu afleiðingarnar orðið mun verri, en raunin var. Ekki er vitað nákvæmlega hversu mörg hús flæddi inn í, en tilkynnt var til tæknideildar um leka inn í kjallara í þremur húsum á Siglufirði og tvö í Ólafsfirði,“ segir í tilkynningu.

Til að draga úr hættu á innrennsli í kjallara húsa var dælt úr brunnum og lögnum í báðum bæjarkjörnum með tveimur slökkviliðsbílum og tveimur sérútbúnum dælubílum, ásamt lausum dælum. Þá eru úrbætur á holræsakerfinu langt komnar en gert er ráð fyrir að þeim ljúki á næsta ári, að því er segir í tilkynningu.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.