Tónlist

Fiðringur í klofi norsk-ís­lensks rappara fór fyrir brjóstið á kristnum Norð­manni

Sylvía Hall skrifar
Kjartan Lauritzen nýtur mikilla vinsælda í Noregi.
Kjartan Lauritzen nýtur mikilla vinsælda í Noregi. Instagram

Rapparinn Kjartan Lauritzen, sem heitir réttu nafni Per Áki Sigurdsson Kvikne, nýtur töluverða vinsælda í Noregi fyrir glaðlega rapptónlist sína. Föstudaginn 19. júlí síðastliðinn var eitt vinsælasta lag hans, Fredag, spilað í morgunþætti norska ríkisútvarpsins og hefur sú spilun dregið töluverðan dilk á eftir sér.

Lagið kom út árið 2016 og er glaðlegur sumarsmellur sem, líkt og nafnið gefur til kynna, fjallar um gleðina sem fylgir því að ljúka vinnuvikunni. Snýr textinn einna helst að skemmtanahaldi og stelpum sem fór öfugt ofan í einn hlustanda stöðvarinnar.

Gunnar Johnstad, kristinfræðikennari í Noregi, skrifaði lesendabréf í dagblaðið Bergens Tidende þar sem hann gagnrýnir stöðina fyrir spilun lagsins og spyr hvernig stöðin geti spilað svo „dónalegt lag“. Textabrotið sem Johnstad tiltekur sérstaklega fjallar um fiðring í klofi á fimmtudagskvöldi og berbrjósta stúlku.

Johnstad spyr hvernig texti sem fjallar að stærstum hluta um fyllerí og kynlíf eigi upp á borðið hjá ríkisútvarpinu. Hann segir börn og ungmenni hlusta á stöðina og það sé því ósæmilegt að spila lagið.

Ætla að læra af mistökunum 

Í svari ríkisútvarpsins segir að lagið hafi verið spilað vegna tónlistarhátíðar sem fór fram á þessum tíma. Kjartan Lauritzen var á meðal þeirra sem komu fram á hátíðinni og því þótti tilvalið að spila föstudagslagið hans á umræddum föstudegi.

Þau biðjast afsökunar á að hafa ekki hlustað á texta lagsins fyrir fram og segja ákvörðunina hafa verið ranga. Lagavalið væri ekki viðeigandi í morgunþættinum og það yrði ekki spilað framvegis.

„Ég geri mitt besta að dreifa ást og gleði“ 

Kjartan hefur brugðist við gagnrýni Johnstad og svari ríkisútvarpsins og er verulega ósáttur. Hann segir viðbrögð ríkisútvarpsins vera ógnvekjandi og óásættanleg.

„Ég geri mitt besta í að dreifa ást og gleði í annars myrkum heimi, en það er jákvætt að við búum í svo friðsælu og penu landi að við finnum leiðir til þess að eyða dýrmætum tíma í að hneykslast á lagi um FÖSTUDAG í útvarpinu,“ skrifar Kjartan á Instagram.

Aðdáendur rapparans hafa sýnt honum stuðning og hneykslast margir á viðbrögðum stöðvarinnar. Kjartan, sem er með yfir þrjátíu þúsund fylgjendur á Instagram, hefur farið ófögrum orðum um stöðina á síðu sinni í dag og segist vera hugsi yfir málfrelsinu í landinu ef þetta eru viðbrögð ríkismiðilsins.


 
 
 
View this post on Instagram
A post shared by @kjartanlauritzen on



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.