Formúla 1

Upphitun: Þýski kappaksturinn um helgina

Bragi Þórðarson skrifar
Vettel henti frá sér fyrsta sætinu í heimakeppni sinni í fyrra.
Vettel henti frá sér fyrsta sætinu í heimakeppni sinni í fyrra. Getty

Nú er tímabilið hálfnað í Formúlu 1, ellefta umferðin fer fram á Hockenheim brautinni í Þýskalandi um helgina.

Mercedes hefur verið allsráðandi það sem af er ári. Aðeins einu sinni hefur liðið sýnt veikleika, það var í hitanum í Austurríki þegar báðir bílar liðsins ofhitnuðu.

Ferrari, sem leit mjög vel út í prófunum fyrir tímabilið, hefur viðurkennt að grunnhugmyndafræðin á bíl þeirra sé röng. Svo í stað þess að vera berjast við Mercedes eins og liðið hefur gert síðustu ár er Ferrari nú í hörku slag við Red Bull um annað sætið.

Sérstaklega hefur verið gaman að fylgjast með ungstirnunum Max Verstappen og Charles Leclerc berjast. Leclerc hefur verið mjög fljótur undanfarið og er farinn að setja pressu á liðsfélaga sinn, Sebastian Vettel.

Slagurinn milli Max Verstappen og Charles Leclerc hefur verið magnaður í undanförnum keppnum. Getty

Vettel með hræðileg mistök í fyrra

Kappaksturinn á Hockenheim brautinni í fyrra var afar líflegur. Lewis Hamilton byrjaði fjórtándi eftir að vélarbilun kom upp í tímatökum.

Sebastian Vettel, sem þá var 8 stigum á undan Hamilton í heimsmeistaramótinu, byrjaði á ráspól. Um miðbik keppninnar var Vettel með örugga forustu en þá byrjaði að rigna.

Á blautri brautinni missti Þjóðverjinn stjórn á bíl sinnum, klessti á vegg og datt úr leik. Hamilton stóð uppi sem sigurvegari og lét forustuna í mótinu aldrei af hendi eftir það. Margir vilja meina að Vettel hafi tapað titlinum með þessum mistökum.

Æfingar, tímatökur og kappaksturinn sjálfur verður að sjálfsögðu í beinni útsendingu á Stöð 2 Sport um helgina. Ræst verður af stað í kappaksturinn klukkan 13:00 á sunnudag.





Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.