Formúla 1

Uppgjör: Hamilton sigrar og Vettel með enn ein mistökin

Bragi Þórðarson skrifar
Breski kappaksturinn um helgina var einn sá allra líflegasti í manna minnum.
Breski kappaksturinn um helgina var einn sá allra líflegasti í manna minnum. Getty
Lewis Hamilton hefur nú unnið breska kappaksturinn alls sex sinnum, oftar en nokkur annar. Keppnin á Silverstone um helgina fer sennilega í sögubækurnar fyrir að vera einn sá allra skemmtilegasti frá upphafi.

Valtteri Bottas byrjaði á róspól og hélt forustu sinni eftir fyrstu beygju. Liðsfélagi hans, fimmfaldi heimsmeistarinn Lewis Hamilton, ræsti annar og setti gríðarlega pressu á Finnann á fyrstu hringjum kappakstursins.

Á fjórða hring komst Hamilton framúr en Bottas svaraði fyrir sig strax í næstu beygju og náði fyrsta sætinu aftur.

Valtteri fór fyrstur þeirra inná þjónustusvæðið í dekkjaskipti á sextánda hring og setti meðalmjúku dekkin undir. Það þýddi að Bottas þyrfti að stoppa aftur til að setja mjúku dekkin undir.

 

Hamilton sló enn eitt metið með sigri sínum um helginaGetty
Lukkudísirnar með Hamilton um helgina

Þá freistaði Hamilton þess að komast framúr liðsfélaga sínum með því að stoppa aðeins einu sinni. Lukkudísirnar voru með Bretanum og á tuttugasta hring keyrði Antonio Giovanazzi útaf og öryggisbíllinn var kallaður út.

Lewis notaði tækifærið og fór inná þjónustusvæðið, setti hörðu dekkin undir og kom út í fyrsta sæti. Kappaksturinn var auðveldur fyrir heimamanninn eftir það og stóð Hamilton uppi sem öruggur sigurvegari.

Á lokahring keppninnar kórónaði Bretinn sigur sinn með því að ná hraðasta hring, þrátt fyrir að vera á 30 hringja gömlum dekkjum.

Með sigrinum er Hamilton orðinn sigursælasti ökuþórinn í sögu breska kappakstursins með sex sigra alls. Nú hefur Lewis unnið sjö af tíu keppnum ársins og leiðir heimsmeistaramótið með 39 stiga forskot á Bottas sem endaði annar um helgina.

 

Ljóst er að slagurinn í Formúlunni verður líflegur næstu 15 árin ef Verstappen og Leclerc halda þessu áfram.Getty
Einn magnaðasti slagur í sögu Formúlunnar

Ungstirnin Max Verstappen og Charles Leclec héldu uppteknum hætti frá því í Austurríki og börðust eins og hundur og köttur nánast allan kappaksturinn.

Leclerc komst fram fyrir Hollendinginn í ræsingunni en ljóst var að Red Bull bíll Verstappen var hraðari. Charles varðist hetjulega og var enn á undan þegar ökuþórarnir komu saman inná þjónustusvæðið á þrettánda hring.

Stoppið hjá Leclerc heppnaðist vel en liðsmenn Red Bull voru enn sneggri að skipta um dekk. Fyrir vikið komst Max framúr Charles og upp í þriðja sætið. Verstappen var ekki lengi í paradís, hann fór of utarlega í fjórðu beygju og Leclerc komst aftur framúr.

Eftir að öryggisbíllinn var kallaður út tapaði Charles miklum tíma og datt niður í sjötta sætið. Honum tókst þó að vinna sig aftur upp í þriðja sætið eftir að liðsfélagi hans, Sebastian Vettel, og Verstappen skullu saman á 37. hring.

Aksturinn sem þessir tveir 21. árs gömlu ökumenn sýndu á sunnudaginn fer sennilega í sögubækurnar með slögum á borð við Gilles Villeneuve og Rene Arnoux í Frakklandi 1979.

,,Þetta er án efa skemmtilegasti kappakstur sem ég hef tekið þátt í’’ sagði Leclerc eftir þessa mögnuðu keppni.

 

Ótrúlegt en satt slapp Red Bull bíll Max Verstappen við meiriháttar tjón í þessum árekstri.Getty
Vettel með enn ein mistökin

Eftir atvikið með öryggisbílinn var Sebastian Vettel skyndilega kominn upp í þriðja sætið eftir að hafa ræst sjötti.

Max Verstappen komst þó framúr Þjóðverjanum á 37. hring en fór þó talsvert utarlega í Stowe beygjuna og þurfti því að verja sína stöðu fyrir næstu beygju.

Verstappen hélt innri línunni, Vettel gafst ekki upp og ætlaði að komast inn fyrir Hollendinginn. Það gekk ekki og Ferrari bíllinn klessti aftan á Red Bull bíl Verstappen.

Ótrúlegt en satt slapp Max frá árekstrinum með nokkuð óskemmdan bíl annað en keppinautur sinn. Vettel braut framvængin á Ferrari bílnum og datt niður í síðasta sæti. Ofan á það fékk Þjóðverjinn 10 sekúndna refsingu fyrir að valda árekstri.

Síðasta árið hefur Sebastian reglulega gert mistök þegar hann er að berjast við aðra á brautinni. Þetta voru hans þriðju á árinu og situr hann nú fjórði í heimsmeistaramótinu, aðeins þremur stigum á undan liðsfélaga sínum.

Vettel verður á heimavelli í næstu keppni á Hockenheim brautinni eftir tvær vikur. Það var einmitt þar fyrir ári síðan sem Þjóðverjinn datt úr leik eftir útafakstur er hann leiddi keppnina.

 




Fleiri fréttir

Sjá meira


×