Phil Mickelson búinn að létta sig um sex kíló á einni viku

Bandaríski kylfingurinn Phil Mickelson verður meðal keppanda á 148. Opna breska meistaramótinu í golfi sem hefst á fimmtudaginn. Það hefur ekki gengið vel hjá Mickelson að undanförnu og hann fór í róttækar aðgerðir fyrir síðasta risamót ársins.

Phil Mickelson hefur verið lítið áberandi á samfélagmiðlum að undanförnu en sagði frá sérstökum undirbúningi sínum fyrir Opna breska meistaramótið.

Phil Mickelson hefur ekki náð að enda meðal tíu efstu á golfmóti síðan hann vann AT&T Pro-Am mótið í febrúar. Hann hefur ekki náð niðurskurðinum í sex af síðustu tíu mótum þar á meðal á þremur af síðustu fjórum mótum sínum.

„Ég hef ekki sett neitt inn á samfélagsmiðlana mína af því ég hef ekki verið ánægður með sjálfan mig eða hvernig ég hef verið að spila. Ég hef ekki gert neitt sem á skilið að koma fyrir augu almennings,“ sagði Phil Mickelson en Telegraph segir frá.

“I have lost 15lbs. I’ve done a six-day fast with water and a special coffee blend for wellness."

Phil Mickelson has taken radical action in an effort to regain form before #TheOpen  https://t.co/xfmLt4CKKX

— Telegraph Sport (@TelegraphSport) July 16, 2019

„Undanfarna tíu daga hef ég endurræst mig til að breyta þróuninni og reyna að koma mér aftur í gang,“ sagði Mickelson í myndbandi á Twitter-síðu sinni.

„Ég er búinn að missa 6,8 kíló. Ég fór í sex daga föstu þar sem ég drakk bara vatn og sérstaka kaffiblöndu. Ég veit ekki hvort þetta mun hjálpa mér að spila betur en ég er tilbúinn að gera hvað sem er til að komast aftur í mitt besta form,“ sagði Phil Mickelson en það má sjá kveðju hans hér fyrir neðan.

Let’s get real for a minute. I haven’t been my best and I’m doing all I can to get it right. I’ll have more Phireside chats soon as well as a fun new series too. Until then, HIT ’s pic.twitter.com/QrqUpThEeV

— Phil Mickelson (@PhilMickelson) July 14, 2019

Phil Mickelson er 49 ára gamall og hefur unnið fimm risamót á ferlinum eða öll mót nema Opna bandaríska meistaramótið. Hann vann Opna breska mótið í fyrsta og eina skiptið árið 2013.

Aðeins átta kylfingar hafa unnið fleiri PGA-mót á ferlinum en Phil Mickelson en sigurinn á AT&T Pro-Am mótinu í febrúar var hans 44. á ferlinum.

Opna breska meistaramótið hefst á fimmtudaginn og verður í beinni útsendingu á Stöð 2 Golf. Sjónvarpsútsendingin á fimmtudaginn hefst eldsnemma eða klukkan 5.30 á fimmtudagsmorguninn.