Golf

Vill vinna fimmta risatitilinn fyrir kylfusveininn

Ástrós Ýr Eggertsdóttir skrifar
Brooks Koepka og Ricky Elliott hafa unnið saman í sex ár
Brooks Koepka og Ricky Elliott hafa unnið saman í sex ár vísir/getty

Brooks Koepka vill bæta við sig fimmta risatitlinum með því að vinna Opna breska risamótið. Ein af ástæðum þess að hann vill vinna mótið er fyrir kylfusveininn sinn.

Koepka er með eitthvað hald á risamótum golfheimsins. Hann vann sinn fyrsta risatitl á Opna bandaríska árið 2017. Hann vann það mót aftur ári seinna ásamt því að vinna PGA meistaramótið. Í ár stóð hann svo aftur uppi sem sigurvegari á PGA meistaramótinu.

Ef hann vinnur Opna breska, sem hefst á morgun, þá mun hann því hafa unnið fimm af síðustu tíu risamótum sem hann hefur tekið þátt í. Hann var ekki með á Mastersmótinu 2018 en hefur annars tekið þátt í öllum fjórum mótum hvers árs frá því hann vann fyrsta titilinn 2017.

Ricky Elliott er 41 árs gamall Norður-Íri sem er uppalinn í Portrush vísir/getty

Opna breska risamótið fer í ár fram á Royal Portrush vellinum í Norður-Írlandi. Þetta er aðeins í annað skiptið sem mótið fer fram á þessum velli, fyrra skiptið var árið 1951.

Kylfusveinn Koepka, Ricky Elliott, er fæddur og uppalinn í Portrush og vill Koepka því vinna mótið fyrir Elliott.

„Það væri ekkert svalara. Ég held að þegar hann var að alast upp þá hafi hann ekki einu sinni látið sig dreyma um að Opna breska yrði haldið hér,“ sagði Koepka.

„Til að bæta ofan á það þá held ég að hann hafi heldur ekki haldið að hann myndi verða hluti af mótinu.“

Elliott hefur verið kylfusveinn Bandaríkjamannsins síðustu sex ár.

„Ef hann nær að vinna mót hér sem kylfusveinn, hann yrði goðsögn ekki satt? Hann er það reyndar nú þegar, en það yrði gaman að sjá hann vinna.“

„Ég mun örugglega heyra kallað á hann ansi oft, ég er viss um að margir af fjölskyldu hans og vinum verða að horfa. Þetta verður sérstök vika fyrir hann.“

Elliott ætti að geta hjálpað Koepka betur en flestir aðrir kylfusveinar í mótinu þar sem hann hefur spilað golf á vellinum nokkuð oft.




Hvort það mun koma þeim félögum alla leið verður að koma í ljós. Koepka og Elliott fara af stað á fyrsta hring rétt eftir hádegi að íslenskum tíma á morgun, fimmtudag. Með þeim í ráshóp eru Louis Oosthuizen frá Suður-Afríku og Indverjinn Shubhankar Sharma.

Bein útsending frá fyrsta hring Opna breska risamótsins hefst á Stöð 2 Golf klukkan 5:30 í fyrramálið.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.