Tónlist

Robert Plant tók Immigrant Song í fyrsta sinn í tvo ára­tugi á Sol­stice

Sylvía Hall skrifar
Robert Plant er enn í fullu fjöri.
Robert Plant er enn í fullu fjöri. Vísir/Getty

Söngvarinn Robert Plant kom fram á lokadegi tónlistarhátíðarinnar Secret Solstice ásamt hljómsveit sinn The Sensational Space Shifters. Eins og flestir vita gerði Plant upphaflega garðinn frægan með hljómsveitinni Led Zeppelin.

Margir heitir aðdáendur Plant lögðu leið sína í Laugardalinn til þess að sjá goðið koma fram og fengu þeir óvæntan glaðning í leiðinni, en söngvarinn tók í fyrsta sinn í yfir tuttugu ár hið goðsagnakennda Immigrant Song.

Lagið var þrettánda og síðasta lag kvöldsins en líkur eru á því að Plant hafi ákveðið að dusta rykið af laginu í tilefni tónleikanna þar sem lagið hefur sterka tengingu við Ísland. Söngvarinn samdi lagið eftir dvöl sína hér á landi sumarið 1970 þegar Led Zeppelin hóf tónleikaferðalag sitt í Reykjavík og flutti það í fyrsta sinn sex dögum eftir tónleikana hér.

„Við komum frá landi íss og snjós. Við vorum gestir íslensku ríkisstjórnarinnar í menningarlegum leiðangri,“ sagði Plant eitt sinn í viðtali um lagið. Hann fór fögrum orðum um landið og sagði móttökurnar hafa verið ótrúlegar.

Sveitin byrjaði flesta tónleika sína á laginu árin 1970 til 1972. Ári seinna var lagið oft orðið uppklappslag sveitarinnar en var seinna tekið af lagalistanum og hefur upprunalega sveitin ekki spilað það saman frá árinu 1973. Árið 1996 spilaði sveitin það á endurkomutónleikum en síðan þá hafði Plant ekki spilað lagið fyrr en hann tók það fyrir gesti Secret Solstice fyrr í mánuðinum samkvæmt Rolling Stone.

Immigrant Song er eitt af vinsælustu lögum Led Zeppelin frá upphafi og því er engin furða að myndband af flutningi Plant hafi vakið mikla athygli á YouTube. Þegar þetta er skrifað hefur verið horft á myndbandið um það bil 200 þúsund sinnum á einni viku.


Tengdar fréttir

Robert Plant á Secret Solstice

Secret Solstice hátíðinni fer fram í Laugardalnum í sjötta skiptið þann 21.-23. júní. Forsvarsmenn hátíðarinnar voru að senda frá sér nýjustu tilkynningu um það hverjir munu koma fram og spila fyrir tónlistarþyrsta landsmenn næsta sumar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.