Körfubolti

Nýi leikmaður Stólanna er tveimur árum eldri en Hlynur Bærings og Jón Arnór

Óskar Ófeigur Jónsson skrifar
Jasmin Perkovic í leik fyrir tíu árum.
Jasmin Perkovic í leik fyrir tíu árum. Getty/ Wojciech Figursk

Hlynur Bæringsson og Jón Arnór Stefánsson hættu í vetur í íslenska landsliðinu vegna aldurs en þeir eru samt langt frá því að vera elstu leikmenn Domino´s deildar karla á næstu leiktíð.

Tindastóll tilkynnti það í gær að félagið væri búið að gera samning við króatíska framherjann Jasmin Perkovic.

Það er ljóst að þar eru Stólarnir ekki að sækja sér einhvern nýgræðing í boltanum.

Jasmin Perkovic er orðinn 38 ára gamall en hann er fæddur árið 1980. Perkovic mun halda upp á 39 ára afmælið sitt á jóladag. Perkovic er síðan 205 sentímetrar á hæð og 117 kíló. Hann er því engin smásmíði.

Hlynur Bæringsson og Jón Arnór Stefánsson eru báðir fæddir árið 1982 og það eru líka tveir aðrir liðsfélagar Jóns Arnórs hjá KR eða þeir Jakob Örn Sigurðarson og Helgi Már Magnússon.

Perkovic lék sína fyrstu leiki sem atvinnumaður með Rijeka Rijeka í Króatíu fyrir meira en tuttugu árum síðan og á ferlinum hefur hann spilað með liðum frá Króatíu, Slóveníu, Bosníu, Grikklandi, Þýskalandi, Ítalíu, Austurríki, Kúveit og Slóvakíu.

Perkovic kláraði síðustu leiktíð á að vera deildarmeistari í Slóvakíu með Inter Bratislava. Þar á undan var hann deildarmeistari í Austurríki.

Á síðasta tímabili var Jasmin Perkovic með 7,8 stig og 3,1 frákast að meðaltali á 13,7 mínútum í leik. Tímabilið á undan var hann með 12,5 stig og 7,0 fráköst að meðaltali á 27,5 mínútum í leik með króatíska liðinu KK Skrljevo.

Perkovic vann silfur á HM 21 árs liða með króatíska landsliðinu árið 2001. Hann hefur líka orðið þýskur og bosnískur meistari á sínum ferli.




Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.