Formúla 1

Daníel og Ásta nálgast met Ómars og Jóns

Bragi Þórðarson skrifar
Daníel og Ásta Sigurðarbörn unnu Hamingjurallið með 47 sekúndna forskot í næstu áhöfn.
Daníel og Ásta Sigurðarbörn unnu Hamingjurallið með 47 sekúndna forskot í næstu áhöfn. Guðný Guðmarsdóttir

Rallaðar voru leiðir um Þorskafjarðaheiði, Eyrarfjall og Vatnsfjarðarnes og var keppnin hluti af dagskrá Hamingjudaga á Hólmavík.

Baldur Arnar Hlöðversson og Heimir Snær Jónsson leiddu Íslandsmótið fyrir keppnina eftir sigur í fyrstu umferðinni. Þeir félagar þurftu þó að sætta sig við fjórða sætið í Hólmavík og töpuðu því forustunni í mótinu.

Fimmtu urðu reynsluboltarnir Sigurður Bragi Guðmundsson og Ísak Guðjónsson á Mitsubishi Lancer Evolution 7, sameigin keppnisreynsla þeirra er 60 ár.

Ragnar Bjarni Gröndal og Emelía Rut Hólmarsdóttir á Lancer Evo 6 enduðu þriðju og í öðru sæti komu Gunnar Karl Jóhannesson og Ísak Sigfússon á Lancer Evo 10. Þegar Gunnar fæddist árið 1996 hafði Sigurður Bragi keppt í ralli í ellefu ár.

Hörkuslagur var um annað sætið og voru aðeins 47 sekúndur á milli Sigurðar Braga og Ísaks í fimmta sæti og Gunnar Karls og Ísaks í öðru sæti.
 

Jósef og Guðni stóðu uppi sem sigurvegarar í AB Varahluta flokknum Guðný Guðmarsdóttir

Daníel og Ásta í sérflokki um helgina

Í algjörum sérflokki í fyrsta sætinu komu systkynin Daníel og Ásta Sigurðarbörn á Mitsubishi Lancer Evo 8. Þau kepptu ekki í fyrstu umferðinni en virtust þó ekkert koma ryðguð til leiks. Forskot þeirra var tæp mínúta á annað sætið eftir þær sex sérleiðar sem eknar voru.

Sigursælustu systkyni í íslenskri rallsögu eru bræðurnir Ómar og Jón Ragnarsynir með átján sigra og þrjá titla.

Daníel og Ásta eru nú þegar komin með þrjá titla og var sigurinn um helgina sá sextándi á þeirra farsæla ferli sem hófst árið 2006.

Fari svo að Daníel og Ásta sigri þær tvær keppnir sem eftir eru á tímabilinu munu þau því jafna met Ómars og Jóns í fjölda sigra og eiga góða möguleika á að bæta met þeirra í fjölda titla.

Í AB Varahluta flokknum sigruðu Jósef Heimir Guðbjörnsson og Guðni Freyr Ómarsson á Subaru Impreza. Þeir hafa því unnið báðar keppnirnar í ár og hafa öruggt forskot í Íslandsmótinu í AB Varahluta flokknum.

Úrslit helgarinnar þýða að Gunnar Karl og Ísak leiða nú Íslandsmótið, fjórum stigum á undan Baldri Arnari og Heimi. Tvær umferðir eru eftir, næsta keppni er hið alþjóðlega Rallý Reykjavík sem fer fram í lok ágúst.
 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.