Formúla 1

Tvær refsingar á 50 metrum

Bragi Þórðarson skrifar
Daniel Ricciardo fékk tvær refsingar á einum 50 metra kafla um helgina.
Daniel Ricciardo fékk tvær refsingar á einum 50 metra kafla um helgina. Getty

Daniel Ricciardo kom sjöundi í mark í franska kappakstrinum um helgina. Á 50 metra kafla á síðasta hringnum fékk Ástralinn hinsvegar tvær 5 sekúndna refsingar og féll niður í ellefta sætið.

Hörkuslagur var um sjöunda sætið á síðasta hring franska kappakstursins á sunnudaginn. Aðeins tvær sekúndur skildu að Lando Norris, Daniel Ricciardo, Kimi Raikkonen og Nico Hulkenberg.

McLaren bíll Norris var bilaður og átti ungi Bretinn því í miklu basli með að halda uppi nægum hraða.

Þetta nýtti Ricciardo sér í áttundu beygju og komst framúr hægfara McLaren bílnum. Þetta gerði hann hinsvegar með því að fara útaf brautinni og koma hættulega inná hana aftur.

Við útafaksturinn missti Ástralinn Kimi Raikkonen fram fyrir sig en Daniel komst þó aftur framúr honum eftir níundu beygju.

Enn og aftur gerði Ricciardo þau mistök að taka framúr útaf brautinni. Fyrir vikið var honum refsað um fimm sekúndur fyrir bæði atvikin, alls tíu sekúndur. Renault ökuþórinn endaði því kappaksturinn ellefti og stigalaus.
 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.