Tónlist

Gerir fastlega ráð fyrir að missa röddina á Spice Girls tónleikum

Hljómsveitin GRL PWR flytur lög Spice Girls.  Mynd/Saga Sig
Hljómsveitin GRL PWR flytur lög Spice Girls. Mynd/Saga Sig

Elísabet Ormslev er einn af fimm meðlimum sveitarinnar GRL PWR sem gert hefur garðinn frægan fyrir óð sinn til Spice Girls eða Kryddpíanna. Aðrir meðlimir sveitarinnar eru Salka Sól, Stefanía Svavars, Þuríður Blær og Karó með tilfallandi gestasöngkonum á borð við Svölu Björgvins og GDRN. Á föstudaginn slær sveitin upp veislu á Gauknum til að fagna því að Kryddpíurnar séu hvergi nær hættar og verður leikurinn síðan endurtekinn á Græna hattinum á Akureyri 21. júní.

Elísabet segir hljómsveitina hafa orðið til eftir gamlársball hljómsveitarinnar Babies í Gamla bíói árið 2017. „Þar tókum við tvö Spice Girls lög og viðbrögðin voru svo svakaleg að ég og Salka ákváðum að ráðast í þetta.“ Hún bætir við að eftirspurn eftir tónleikum hafi ekki linnt eftir stofnun hópsins en landinn virðist ekki fá nóg af krydduðu poppinu og sjálfseflandi boðskapnum.

Sjálf uppgötvaði Elísabet Kryddpíurnar 5 ára gömul eða í kringum 1998 þegar poppsveitin var á hápunkti ferilsins. „Ég átti haug af Spice Girls dóti og hlustaði varla á neitt annað.“ Elísabet heillaðist af samheldni sveitarinnar og hvatningu þeirra til ungra stúlkna um allan heim. „Þær fengu allar að vera nákvæmlega eins og þær vildu svo að það var auðvelt fyrir aðdáendur að finna einhverja til að tengja við.“ Elísabet tengdi persónulega mest við söngkonuna Geri „af því að ég var rauðhærð en mig langaði líka stundum að vera Mel B“ en Elísabet verður einmitt í hlutverki Geri á sviðinu með GRL PWR.

Elísabet telur boðskap Krydd­píanna eiga erindi við samtímann og segir GRL PWR taka þátt í að miðla honum áfram. „Stór partur af okkar boðskap er að hvetja stelpur áfram og ekki láta neitt stoppa sig.“ Hún segir Kryddpíurnar hafa verið ákveðna frumkvöðla í eflingu á samheldni og nýrri birtingarmynd vináttu kvenna. „Konur eru konum bestar og það er nákvæmlega okkar boðskapur líka.“

Elísabet tekur fram að tónlistin standi enn þá upp úr en hún lærði hvert einasta lag af fyrstu tveimur plötum Spice Girls aðeins fimm ára. „Ég hef eflaust verið að gera aðra á heimilinu brjálaða, ég spilaði þær svo mikið og á algjöru blasti.“ Aðspurð segir Elísabet að hana hafi langað mikið út að sjá Spice Girls þegar tilkynnt var um endurkomutónleika þeirra. „Ég öskraði mjög hátt þegar ég sá fréttirnar en þær sem ég myndi vilja deila upplifuninni með eru uppteknar með lítil Baby Spice,“ en Elísabet segir það ekki óhugsandi að hún leggi í ferðalagið ein. Um eigin tónleika segir Elísabet aðdáendur geta búist við brjálaðri nostalgíu og yfirflæðandi „girl power“ en Elísabet gerir fastlega ráð fyrir að missa röddina eftir kvöldið.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.