Sigmundur Davíð Gunnlaugsson, formaður Miðflokksins, segir að fullyrðingar um að vantraust á Miðflokknum innan þingflokks Sjálfstæðisflokksins hafi spillt fyrir samkomulagi um þinglok hafi verið „eftiráskýring“ eftir uppákomu í flokknum. Þingflokksformenn Mið- og Sjálfstæðisflokks ræða áfram saman um þinglokin.

Óvissa ríkir enn um þinglok eftir að Miðflokkurinn stóð einn utan samkomulags sem stjórnarandstaðan gerði við ríkisstjórnina um dagskrá þingsins í gær. Þingfundi var slitið síðdegis í dag og kemur þingið ekki saman aftur fyrr en á þriðjudag.

Bergþór Ólason, starfandi þingflokksformaður Miðflokksins, segist í samtali við Vísi hafa fundað með Birgi Ármannssyni, formanni þingflokks Sjálfstæðisflokksins, nú í kvöld. Þeir verði áfram í samskiptum um helgina til að leita lausna um það sem út af stendur í samkomulaginu.

Samkomulag við Miðflokkinn var sagt í burðarliðnum í gær en að þingflokkur Sjálfstæðisflokksins hafi hafnað því vegna vantrausts í garð hans.

Samkvæmt heimildum Vísis var það handskrifuð athugasemd Sigmundar Davíðs á samningsdrögin um að einhver ákvæði þeirra væru „samkvæmt samtali“ sem sat í sjálfstæðismönnum. Þeim hafi fundist orðalagið of opið til túlkunar og að samkomulagið við Miðflokksmenn þyrfti að vera í fastari skorðum.

„Það má segja að allir lausir endar auðvitað vekja áhyggjur. Það er auðvitað búið að vera svolítið sérstakt ástand hérna í þinginu út af málþófi Miðflokksins í þessum orkupakkamálum,“ sagði Birgir í kvöldfréttum Stöðvar 2 í kvöld.

Málþóf Miðflokksins um þriðja orkupakkann svonefnda hefur gert umræður um málið þær lengstu í sögu Alþingi. Í heildina hafa þær staðið yfir í 138 klukkustundir. Samkvæmt samkomulagsdrögunum hefði orkupakkamálið verið afgreitt á stuttu sumarþingi í ágúst.

Athugasemdin ekki fyrirvari

Spurður út í athugasemdina sem hann hripaði niður á samningsdrögin í viðtali í kvöldfréttum Stöðvar 2 sagði Sigmundur Davíð að ekki hafi verið um fyrirvara að ræða heldur hafi hann einfaldlega vísað til þess að samkomulagið væri í samræmi við samtal um gerð þess. Hann skýrði ekki frekar hver tilgangur hennar var.

Þá gerði hann lítið úr vantrausti í garð flokks hans í ranni Sjálfstæðisflokksins og gaf í skyn að það væri aðeins „einn eða hugsanlega fleiri“ sjálfstæðismenn.

„Þessi sömu þingmenn held ég að hafi fyrst og fremst búið þetta til sem eftiráskýringu eftir að það verður einhver uppákoma á þingflokksfundi sjálfstæðismanna,“ sagði Sigmundur Davíð.

Sérfræðingahópur helsti ásteytingarsteinninn

Miðflokkurinn krefst þess að komið verði á fót sérfræðingahópi til að fara yfir þær áhyggjur sem hann hefur af samþykkt þriðja orkupakkans. Bergþór segir við Vísi að sérfræðingahópurinn sé helsti ásteytingarsteinninn í viðræðum við sjálfstæðismenn um þinglok.
Hann vildi ekki svara því hvort að sérfræðingahópurinn væri ófrávíkjanleg krafa Miðflokksins en að hann teldi það ekki ósanngjarna ósk. Ekki komi annað til greina en að nýta tímann fram að haustþingi til að svara spurningum um málið.