Allt bendir til sigurs vinstri blokkarinnar í Danmörku

Útgönguspár í dönsku þingkosningunum sýna að stjórn Lars Løkke Rasmussen sé fallin og vinstri blokkin nái þingmeirihluta.

Jafnaðarmannaflokkurinn er stærstur með 25,3% atkvæða eða 45 þingmenn og því líklegt að Mette Frederiksen taki við sem næsti forsætisráðherra Danmerkur.

Þá lítur út fyrir að Þjóðarflokkurinn muni tapa rúmlega helming af fyrra fylgi sínu en spár gera ráð fyrir um það bil 9,8% fylgi, samanborið við 21,1% í kosningunum árið 2015 og tapar þar með 19 þingmönnum og stendur eftir með 18. Þá mælist Venstre með 20,9% atkvæða eða 37 þingmenn.

Kosningaþátttaka er með betra móti en klukkan sex í dag að staðartíma höfðu rúm 74 prósent greitt atkvæði samanborið við 70 prósent í síðustu kosningum árið 2015.