Formúla 1

Hamilton: Erfiðasta keppnin á ferlinum

Bragi Þórðarson skrifar
Hörkuslagur var um fyrsta sætið í Mónakó milli Lewis Hamilton og Max Verstappen.
Hörkuslagur var um fyrsta sætið í Mónakó milli Lewis Hamilton og Max Verstappen. Getty

Sjötta umferðin í Formúlu 1 fór fram á sögufrægum götum Mónakó um helgina. Kappaksturinn var æsispennandi frá fyrsta hring til hins síðasta.

Fimmfaldi heimsmeistarinn, Lewis Hamilton, kom fyrstur í mark á sínum Mercedes eftir að hafa ræst á ráspól.

Mercedes liðið gerði þó mistök er Hamilton kom inn á þjónustusvæðið á 11. hring er öryggisbíllinn var kallaður út. Þá setti liðið meðalhörðu dekkin undir bíl Hamilton á meðan að flestir aðrir settu hörðu dekkin undir.

,,Þessi dekk eru búin, það þarf kraftaverk til ef við ætlum okkur að vinna’’ sagði Lewis í talstöðinni til liðsins þegar um 20 hringir voru eftir.

Max Verstappen sótti að Hamilton stanslaust síðustu 50 hringi kappakstursins. Bretinn vissi þó vel að erfitt er að taka framúr á þröngum götum Mónakó.

Verstappen reyndi þó allt hvað hann gat, sem endaði með að bílarnir skullu saman þegar aðeins tveir hringir voru eftir. Sem betur fer urðu engar skemmdir á bílunum, en Verstappen þurfti þó að sætta sig við annað sætið.

Hollendingurinn endaði þó fjórði eftir að hafa verið refsað um fimm sekúndur. Refsingin var fyrir glæfraakstur á þjónustusvæðinu er Max keyrði á Mercedes bíl Valtteri Bottas.
 

Lewis Hamilton tileinkaði Niki Lauda sigurinn Getty

Minnst var Niki Lauda um helgina

,,Þessi sigur var fyrir Niki’’ sagði Hamilton eftir keppnina. ,,Hann hafði mikil áhrif á minn feril og þetta lið, aðal markmið mitt í dag var að gera hann stoltann’’.

Hamilton keppti með rauðan hjálm á sunnudaginn í minningu Niki Lauda, sem lést á mánudaginn. Þá voru einnig öryggishlífar Mercedes bílanna málaðar rauðar til að minna á frægu rauðu derhúfuna sem Lauda var ávalt með.

Sebastian Vettel kom annar í mark á sínum Ferrari og liðsfélagi Lewis, Valtteri Bottas, varð að sætta sig við þriðja sætið.

Þetta var því í fyrsta skiptið á árinu sem að Mercedes ökuþórarnir enda ekki í fyrsta og öðru sæti. Úrslitin þýða að Hamilton eykur forskot sitt á toppi heimsmeistaramótsins í 17 stig.

Liðsfélagi Vettel hjá Ferrari, Charles Leclerc, vill sennilega gleyma þessari helgi sem fyrst. Heimamaðurinn ræsti sexdándi eftir mistök Ferrari liðsins í tímatökum. Leclerc varð frá að hverfa á 15. hring eftir að hafa skemmd bíl sinn í árekstri.

Næsta keppni fer fram í Kanada eftir tvær vikur. Hamilton hugsar sér gott til glóðarinnar því hann hefur alls unnið sex sinnum á Montreal brautinni.
 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.