Lilja gefur ekki upp afstöðu til þungunarrofs

Lilja Alfreðsdóttir menntamálaráðherra vill ekki gefa upp afstöðu sína til þungunarrofsfrumvarpsins sem samþykkt var í fyrradag þar sem konum er gert kleift að rjúfa þungun á 22. viku meðgöngu. Hún var annar tveggja ráðherra sem voru fjarverandi við atkvæðagreiðsluna, þar sem hún er í útlöndum.

Þórdís Kolbrún R. Gylfadóttir, dóms- og iðnaðarmálaráðherra, var einnig fjarverandi atkvæðagreiðsluna, en gerði grein fyrir afstöðu sinni í færslu á samfélagsmiðlum.

„Ég studdi frumvarpið í 2. umræðu og studdi það í anda í dag. Tímarammi sá sami – ákvörðunin þar sem hún á heima,“ sagði Þórdís.

Lilja segist hafa gert fyrirvara við málið í ríkisstjórn. „Ég sagði að mér fyndist 22 vikur ansi langt gengið. En ég var ekki þarna og er ekki tilbúin til þess að fara yfir þetta akkúrat núna,“ segir Lilja.