Körfubolti

11. apríl er stór dagur fyrir Friðrik Inga

Óskar Ófeigur Jónsson skrifar
Friðrik Ingi Rúnarsson með Íslandsbikarinn eftir að hann gerði Njarðvíkinga á Seltjarnarnesi í apríl 1998.
Friðrik Ingi Rúnarsson með Íslandsbikarinn eftir að hann gerði Njarðvíkinga á Seltjarnarnesi í apríl 1998. Vísir/ÞÖK
Í dag eru liðin 28 ár frá því að Njarðvík varð Íslandsmeistari í körfubolta í sjöunda sinn 1991 og 23 ár síðan að Grindavík vann Íslandsmeistaratitilinn í fyrsta sinn 1996. Báðir titlarnir komu í hús 11. apríl og þjálfari beggja liða var Friðrik Ingi Rúnarsson.

Uppáhaldsdagur körfuboltaþjálfarans Friðriks Inga Rúnarssonar hlýtur því að vera í dag ellefta dag aprílmánaðar. Þetta er líka mikill Íslandsmeistaradagur því Keflavík hefur einnig náð að verða Íslandsmeistari á þessum degi en það var árið 1992.

Opnan í DV 12. apríl 1991.Skjámynd/DV
Friðrik Ingi Rúnarsson var enn bara 22 ára og á sínu fyrsta ári sem þjálfari í úrvalsdeild karla þegar Njarðvíkingar unnu Íslandsmeistaratitilinn 11. apríl 1991 eftir sigur í oddaleik á móti Keflavík. Fimmti og síðasti leikurinn fór fram í Ljónagryfjunni í Njarðvík.

Njarðvík vann oddaleikinn á móti Keflavík með níu stigum eða 84-75. Gunnar Örlygsson var langstigahæstur í Njarðvíkurliðinu með 27 stig en Rondey Robinson var með 17 stig og Teitur Örlygsson skoraði 15 stig. Teitur var einmitt einu ári eldri en Friðrik Ingi þjálfari.

ViðtaL við Friðrik Inga í DV 12. apríl 1991.Skjámynd/DV
Forsíðumyndin í DV 12. apríl 1996.Skjámynd/DV
Friðrik Ingi var búinn að prófa sig hjá KR þegar hann kom til Grindavíkur og var enn bara 27 ára þegar hann vann sinn annan Íslandsmeistaratitil sem þjálfari þegar Grindavík vann sigur á Keflavík í sjötta leik úrslitaeinvígisins 11. apríl 1996. Leikurinn fór fram í Keflavík.

Á fyrsta tímabili Friðriks Inga með Grindavík tapaði liðið í úrslitaeinvíginu á móti Njarðvík en það var annað árið í röð sem Grindvíkingar fengu silfrið. Þeir kláruðu aftur á móti dæmið og unnu sinn fyrsta titil á öðru ári Friðriks Inga. Íslandsmeistaratitilinn var loksins í höfn eftir 22 stiga sigur á Keflavík, 96-73, í Keflavík í sjötta leik einvígsins en þá þurfti að vinna fjóra leiki til að verða meistari.

Rodney Dobart var stigahæstur hjá Grindavík með 21 stig en þeir    Marel Guðlaugsson og Hjörtur Harðarson voru með 18 stig hvor. Hjörtur var líka með 8 fráköst og 8 stoðsendingar. Guðmundur L Bragason, fyrirliði, var með 12 stig og 5 stoðsendingar en hann var einu ári eldri en Friðrik Ingi þjálfari.

Íþróttaopna DV 12. apríl 1996.Skjámynd/DV
Friðrik Ingi hefur unnið einn Íslandsmeistaratitil í viðbót en hann gerði Njarðvíkina að Íslandsmeisturum 1998. Sá titill vannst aftur á móti á Seltjarnarnesinu 19. apríl 1998.

Baksíða Morgunblaðsins 12. apríl 1991.Skjámynd/Morgunblaðið
Viðtal Morgunblaðsins við Friðrik Inga Rúnarsson 12. apríl 1991.Skjámynd/Morgunblaðið



Fleiri fréttir

Sjá meira


×