Yfir 1500 manns orðnir atvinnulausir á fáeinum sólarhringum

Sannkölluð uppsagnahrina hefur gengið yfir landið síðustu sólarhringa en á annað þúsund manns hefur verið sagt upp störfum í vikunni. Margar uppsagnanna má rekja beint til gjaldþrots flugfélagsins WOW air en það er þó ekki algilt. Hér á eftir fylgir samantekt á þeim uppsögnum sem greint hefur verið frá síðustu daga – og af nógu er að taka.

Ellefu hundruð hjá WOW air

Stærsta hópuppsögnin var hjá WOW air, sú umfangsmesta í manna minnum, en ellefu hundruð manns misstu vinnuna hjá flugfélaginu eftir að tilkynnt var að félagið hefði hætt starfsemi að fullu. 

Í kjölfarið var ákveðið að Vinnumálastofnun verði veitt 80 milljóna króna tímabundið framlag vegna gjaldþrotsins til að þjónusta þá sem misstu vinnuna. Í kvöldfréttum Stöðvar 2 kom svo fram að mörg hundruð umsóknir um atvinnuleysisbætur hafi borist stofnuninni síðan í gærmorgun – fleiri en nokkurn tímann áður á svo stuttum tíma.

 

Áhrifa WOW gætir víða

Þá munaði einnig töluvert um uppsagnir 315 starfsmanna hjá Airport Associates á Keflavíkurflugvelli. Tilkynnt var um uppsagnirnar í dag en áður hafði legið fyrir að grípa þyrfti til uppsagna vegna gjaldþrots WOW Air.

Ferðaþjónustufyrirtækið Kynnisferðir sagði svo upp 59 starfsmönnum í gær. Rúmlega fjögur hundruð manns hafa starfað hjá Kynnisferðium að undanförnu en Björn Ragnarsson, framkvæmdastjóri Kynnisferða, sagði í samtali við Vísi að uppsagnirnar hafi verið afar erfið ákvörðun.

Gray Line fylgdi svo í kjölfar kollega sinna hjá Kynnisferðum og tilkynnti um uppsögn þriggja starfsmanna í dag.

Í gær og í dag var sex starfsmönnum Fríhafnarinnar á Keflavíkurflugvelli sagt upp störfum. Þorgerður Þráinsdóttir framkvæmdastjóri Fríhafnarinnar sagði í samtali við Vísi í kvöld að uppsagnirnar mætti rekja beint til gjaldþrots WOW þar sem félagið hefði flutt inn um 30 prósent viðskiptavina Fríhafnarinnar.

Þá hefur Ferðaskrifstofan Gaman-Ferðir sagt upp hluta starfsfólks síns eftir að WOW air varð gjaldþrota. Flugfélagið átti 49 prósenta hlut í ferðaskrifstofunni en framkvæmdastjóri hennar sagði stjórnendurna ætla að vaða í gegnum eld og brennistein til að þurfa ekki að standa við uppsagnirnar. Hann vildi þó ekki gefa upp hversu mörgum var sagt upp hjá fyrirtækinu.

BYGG, Pipar og Síminn

Fjörutíu starfsmönnum var svo sagt upp hjá Byggingarfélagi Gylfa og Gunnars, BYGG. Gylfi Ómar Héðinsson, einn eigenda fyrirtækisins, sagði í samtali við Vísi í dag að um væri að ræða 32 fasta starfsmenn og svo nokkra undirverktaka úr ýmsum stéttum iðnaðarmanna.

Inntur eftir því hvort uppsagnirnar væru beintengdar falli flugfélagsins WOW air sagði Gylfi að um væri að ræða varúðarráðstöfun. Fyrir uppsagnir störfuðu alls 215 hjá BYGG.

Þá greindi RÚV frá því í dag að Origo hefði sagt upp tíu til fimmtán manns á þriðjudag og miðvikudag vegna skipulagsbreytinga.

Haft var eftir Finni Oddssyni forstjóra Origo að augljóslega hafi dregið úr umsvifum á ýmsum sviðum í atvinnulífinu og margt sé mótdrægt. Þar standi upp úr þær kröfur sem nú séu uppi í kjaradeilum á vinnumarkaðnum.

Fimm starfsmönnum var svo sagt upp hjá samskiptafyrirtækinu Símanum í síðustu viku en uppsagnirnar má rekja til breytinga í rekstrarumhverfi fyrirtækisins – ekki gjaldþrots WOW air, samkvæmt upplýsingum frá samskiptafulltrúa Símans. Þá verður verslun Símans í Kringlunni lokað um helgina. 

Í gær var greint frá skipulagsbreytingum hjá Lyfju sem fólu í sér að átta starfsmönnum var sagt upp. Tvö ný stöðugildi verða þó til vegna breytinganna.

Þá sagði Auglýsingastofan Pipar/TBWA upp fimm starfsmönnum í gær. Starfsmenn tóku auk þess á sig tíu prósenta launalækkun næstu sex mánuðina.

Líftæknifyrirtækið WuXi NextCode sagði svo upp 27 starfsmönnum þann 27.  mars. Framkvæmdastjóri félagsins sagði þetta lið í endurskipulagningu fyrirtækisins á heimsvísu en um 40 manns munu starfa hjá NextCode eftir niðurskurðinn.

Sjá fram á fleiri uppsagnir

Ljóst er að a.m.k. 1500 manns hafa misst vinnuna síðustu sólahringa og þess má vænta að fleiri fylgi í kjölfarið. Áhrifafólk í ferðaþjónustunni hefur til að mynda margt lýst yfir áhyggjum af stöðu mála í kjölfar gjaldþrots WOW air. Þannig sagði Bjarnheiður Hallsdóttir formaður Samtaka ferðaþjónusunnar í samtali við Vísi í dag að ekki væri ólíklegt að til frekari uppsagna komi í greininni á næstunni.

Ásberg Jónsson, framkvæmdastjóri Nordic Visitor, sagði jafnframt að höggið sem hljótist af falli flugfélagsins muni ýta mörgum ferðaþjónustufyrirtækjum í þrot.

Þá býst Unnur Sverrisdóttir forstjóri Vinnumálastofnunar við gífurlegu álagi á stofnunina næstu vikur vegna gjaldþrotsins.