Innlent

Þingflokksformenn funduðu vegna endurkomu Gunnars Braga og Bergþórs

Jakob Bjarnar, Kolbeinn Tumi Daðason og Sunna Kristín Hilmarsdóttir skrifa
Gunnar Bragi Sveinsson í þingsal í dag en hann var á þingflokksformannafundinum.
Gunnar Bragi Sveinsson í þingsal í dag en hann var á þingflokksformannafundinum. vísir/vilhelm
Boðað var til þingflokksformannafundar á Alþingi klukkan 13 í dag vegna endurkomu þeirra Gunnars Braga Sveinssonar og Bergþórs Ólasonar, þingmanna Miðflokksins á þing en þeir höfðu verið í ótímabundnu leyfi frá þingstörfum vegna Klaustursmálsins.

Bjarkey Olsen, þingflokksformaður Vinstri grænna, segir að til fundarins hafi verið boðað að ósk þingflokksformanna, fyrst minnihlutans en svo hafi aðrir í meirihlutanum tekið undir beiðnina. Fundurinn stóð yfir í um hálftíma.

„Það var ákveðið að hittast í ljósi þess að þeir væru komnir aftur til starfa.“

Þau hafi farið yfir hlutina og velt því upp hvernig hægt væri að tryggja gott andrúmsloft og vinnufrið. Um er að ræða síðasta þingfundinn í þessari viku.

Á mánudaginn er svo þingflokksfundadagur og segir Bjarkey að þá gefist einstökum þingflokkum færi á að ræða málin í sínum flokki. Formenn allra þingflokka voru viðstaddir fundinn, þar á meðal Gunnar Bragi. Bjarkey segir fundinn hafa verið mjög yfirvegaðan.

Guðmundur Ingi Kristinsson, formaður þingflokks Flokks fólksins.Vísir/Vilhelm

„Númer eitt, tvö og þrjú er boltinn hjá þessum einstaklingum“

Guðmundur Ingi Kristinsson, þingflokksformaður Flokks fólksins, segir að trúnaður ríki um það sem fram fer á þingflokksformannafundum en auðvitað þurfi að ræða endurkomu þingmannanna tveggja. Málið sé grafaralvarlegt.

„Og því miður virðist sem þeir ætli ekki að skammast sín neitt,“ segir Guðmundur Ingi og vísar þar í þingmennina.

Þá kveðst hann skilja ósköp vel kvíða og áhyggjur þeirra þingkvenna sem rætt var um á Klaustri vegna endurkomu þingmannanna.

„Því meira sem ég sé til þeirra því meira skil ég þeirra kvíða því þeir virðast bara ætla að taka þetta á því að sókn sé besta vörnin og hrauna áfram yfir allt og alla,“ segir Guðmundur Ingi.

Spurður nánar út í það hvað hafi verið rætt á fundinum varðandi mögulega lausn á málinu segir hann að finna þurfi einhverja lausn.

„Og ég vona að það verði gert en eins og ég segi, númer eitt, tvö og þrjú er boltinn hjá þessum einstaklingum og við hin erum í mjög slæmum málum vegna þess að á meðan þeir ætla ekki sýna tillitssemi eða nokkurn skapaðan hlut og valta yfir allt og alla þá er þetta bara rosalega erfitt mál að eiga við. En þetta kemur í ljós á næstu dögum.“

Steingrímur J. Sigfússon, forseti Alþingis, varð við beiðni þingflokksformanna um aukafund vegna endurkomu þingmanna Miðflokksins.Vísir/Vilhelm

Ósk frá einum þingflokksformanni sem fleiri studdu

Vísir ræddi stuttlega við Steingrím J. Sigfússon, forseta Alþingis, vegna þessa. Hann vildi ekki tjá sig efnislega um þau mál sem þar voru til umræðu.

„Ég fékk ósk um það frá einum þingflokksformanni og svo var það stutt af fleirum, að skjóta á fundi. Hann snerist um okkar innri mál hér á þinginu.“

Þar hefur væntanlega verið til umfjöllunar endurkoma þeirra þingmanna Miðflokks sem nú hafa snúið til baka eftir leyfi í kjölfar Klausturmála?

„Menn geta bara lesið í það sjálfir. Ég ætla ekkert að tjá mig um það frekar.“


Tengdar fréttir




Fleiri fréttir

Sjá meira


×