Fimmtán ára stöðvaður á rúntinum á bíl móður sinnar

Lögreglan á Suðurnesjum stöðvaði ökumann sem reyndist aðeins fimmtán ára gamall. Hann hafði tekið bifreið móður sinnar í leyfisleysi og farið í bíltúr ásamt tveimur farþegum. Þetta kemur fram í dagbók lögreglu á Suðurnesjum frá síðustu dögum.

Þá hafa mörg umferðarlagabrot komið upp í umdæminu. Á annan tug ökumanna var kærður fyrir of hraðan akstur, sjö til viðbótar voru grunaðir um vímuefnaakstur og þá voru skráningarnúmer tekin af nokkrum bifreiðum sem ýmist voru ótryggðar eða óskoðaðar.

Þá var tilkynnt um þrjú umferðaróhöpp. Í tveimur tilvikum höfnuðu bifreiðirnar utan vegar og skemmdust talsvert en ekki urðu slys á fólki. Í þriðja tilvikinu kviknaði í bifreið á Reykjanesbraut og var hún óökufær eftir brunann. Ökumaður slapp ómeiddur.