Ástarsamband Berta og Árna vekur deilur

Deilt er um kynhneigð Sesame Street-brúðnanna Berta og Árna (e. Bert and Ernie) í Bandaríkjunum.

Í viðtali við hinsegin miðilinn Queerty um helgina sagði Mark Saltzman, áður handritshöfundur fyrir þættina, að sjónvarpspersónurnar ættu í samkynja ástarsambandi. Hafi verið byggðar á sambandi Saltzmans og þáverandi maka hans.

Sesame Workshop, félagið sem heldur utan um framleiðslu þáttanna, tjáði sig um orð Saltzmans í gær. Í tilkynningu þaðan kom fram að Berti og Árni væru bara vinir, brúður án nokkurrar kynvitundar.