Kevin Hart var skíthræddur við dýrin hans Robert Irwin

Robert Irwin, sem sennilega er þekktastur fyrir að vera sonur krókódílaveiðimannsins Steve Irwin, mætti í heimsókn til spjallþáttastjórnandans Jimmy Fallon nú á dögunum og steig þar í fótspor föður síns, sem mætti reglulega í sama þátt, þegar hann var undir stjórn Jay Leno.

Þetta var í annað sinn sem Irwin yngri mætir til Fallon. Þeir feðgar bera ekki bara sama eftirnafnið, því Robert er sláandi líkur föður sínum og hefur yfir að búa sama áhuga á dýralífi líkt og faðir sinn, sem öðlaðist heimsfrægð ásamt eiginkonu sinni, Terri Irwin, þegar þau gerðu heimildaþætti um dýralíf Ástralíu. Hann lét lífið við gerð sambærilegra dýralífsþátta árið 2006.

Í þættinum fékk grínistinn Kevin Hart að kynnast nokkrum dýrum sem Irwin mætti með sér í þáttinn og má segja að hann hafi ekkert verið neitt sérstaklega hrifinn af uppátækinu.

Myndband af heimsókn Irwin er eitt það vinsælasta á YouTube um þessar mundir og hafa margar milljónir horft á þegar þessi frétt er skrifuð. Jimmy Fallon var ekkert heldur mjög hrifinn af gestunum.