Grátlegt tap í spennutrylli í Portúgal

Íslenska karlalandsliðið í körfubolta tapaði 80-77 gegn Portúgal í fyrsta leik liðsins í fyrsta leik liðsins í forkeppni EM 2021.

Ísland byrjaði leikinn af miklum krafti. Það var kraftur og áræðni í íslenska liðinu sem var fimm stigum yfir eftir fyrsta leikhlutann, 19-14.

Jafnræði var þó með liðunum og voru Portúgalarnir aldrei langt undan. Er liðin gengu til búningsherbergja var staðan 34-33, heimamönnum í Portúgal í vil.

Þriðji leikhluti var skelfilegur hjá Íslandi. Liðið tapaði leikhlutanum með tíu stiga mun, 24-14, en varnarleikur liðsins í leikhlutanum var slakur og sóknarleikurinn stirður.

Strákarnir voru hins vegar ekki hættir og náðu að jafna metin í fjórða leikhluta er Kári Jónsson setti niður tvær þriggja stiga körufr í röð og jafnaði í 70-70.

Ísland tók leikhlé er tuttugu sekúndur var eftir og staðan 78-77, Portúgölum í vil. Leikfléttan gekk upp, Martin Hermannsson fékk boltann og keyrði að körfunni og lagði hann í spjaldið.

Í þann mund sem hann lagði hann í spjaldið sló einn leikmaður í spjaldið og hristi þar af leiðandi körfuna sem er bannað. Íslensku leikmennirnir og þjálfararnir vildu eðlilega fá körfu en ekkert var dæmt við litla hrifningu íslenska liðsins.

Ísland braut svo strax af sér og sendi Portúgala á vítalínuna. Þeir skoruðu úr báðum vítunum og aftur tók Ísland leikhlé. Kári Jónsson reyndi lokaskotið en það geigaði. Lokatölur 80-77, Portúgölum í vil.

Martin var stigahæstur íslenska liðsins með tuttugu stig. Auk þess gaf hann átta stoðsendingar. Næstur kom Tryggvi Snær Hlinason með fimmtán stig og fimm fráköst.

Grátlegt tap hjá strákunum í fyrsta leik riðilsins en auk Íslands og Portúgals er Belgía einnig í riðlinum. Belgia vann eins stigs sigur á Portúgal í fyrsta leik þeirra, 66-65.

Næstu leikir Íslands í riðlinum eru í nóvember er liðið mætir Portúgal og Belgíu en liðið spilar þá tvo leiki í alþjóðlegum landsliðsglugga.