Sjúkrabíll og lögregla send á vettvang vegna atviks í húsi við Stigahlíð

Sjúkrabíll og lögregla voru send á vettvang að húsi við Stigahlíð fyrr í kvöld eftir að tilkynning barst um að blóðugur maður hafi bankað upp á í næsta húsi.

Ekki hefur náðst samband við lögreglu höfuðborgarsvæðisins vegna málsins, en slökkvilið höfuðborgarsvæðisins staðfestir að bíll hafi verið sendur á vettvang en ekki er vitað um ástand mannsins.

Lögreglan hefur á undanförnum mánuðum þurft ítrekað að hafa afskipti af íbúum í umræddu húsi, þar af nokkrum sinnum með aðstoð sérsveitar. Um er að ræða tímabundið búsetuúrræði fyrir umsækjendur um alþjóðlega vernd. Allt að sextán einstaklingar dvelja í húsinu í senn sem Reykjavíkurborg er með á leigu.

Íbúi í húsinu sagði við blaðamann Vísis að hann hafi séð annan íbúa með blóð á síðunni, þó að hann hafi sjálfur ekki orðið vitni af einhverjum átökum.

Í húsinu búa á annan tug hælisleitenda en íbúar í Stigahlíð hafa áhyggjur af aðbúnaði þeirra og öryggi í hverfinu.

Að neðan má sjá frétt Stöðvar 2 frá 19. júní þar sem fjallað var um áhyggjur íbúa í götunni.

Fyrstu heimildir Vísis hermdu að sérsveit ríkislögreglustjóra hafi verið kölluð á vettvang vegna málsins. Það hefur hins vegar ekki fengist staðfest hjá lögreglu.