Tryggð við evruna ýtir upp eftir­spurn eftir ítölskum ríkis­skulda­bréfum

Yfirlýsing frá nýjum fjármálaráðherra Ítalíu um að Ítalir muni halda tryggð við evruna og gera allt til að verja fjármálastöðugleika hefur ýtt undir eftirspurn eftir ítölskum ríkisskuldabréfum og lækkað ávöxtunarkröfu um hálft prósentustig.

Frá þessu er greint í FT. Giovanni Tria, nýr fjármálaráðherra Ítala, sagði í samtali við ítalska dagblaðið Corriere della Sera á sunnudag að ríkisstjórn Ítalíu hefði engin áform að hætta í evrusamstarfinu og ríkisstjórnin væri einbeitt í þeirri viðleitni að fyrirbyggja að markaðsaðstæður í ítalska hagkerfinu ýttu Ítölum út í þá vegferð.

Stóraukin eftirspurn eftir ítölskum 2 ára ríkissuldabréfum hefur lækkað ávöxtunarkröfuna á slík bréf um hálft prósent niður í 1,172 prósentum úr 2,731 prósentum en því hámarki náðu vaxtakrafa slíkra bréfa þegar óvissan var hvað mest um nýja ríkisstjórn popúlista á Ítalíu. 

Ávöxtunarkrafa á 10 ára bréfin hefur líka lækkað vegna aukinnar eftirspurnar um næstum 0,26 prósentustig niður í 2,873 prósent en var hæst 3,388 í síðasta mánuði.

Yfirlýsingar Giovanni Tria um að halda tryggð við evruna hefur ekki þýðingu fyrir skuldabréfamarkaði heldur einnig stjórnmálalíf Evrópu í heild sinni. Þegar skuldakreppan reið yfir Grikkland og Spán á sínum tíma, skömmu eftir alþjóðlegu fjármálakreppuna, óttuðust sérfræðingar í álfunni lengi vel að hún myndi smitast til Ítalíu. Lengi vel óttuðust hagfræðingar að ef Grikkir færu út úr evrusamstarfinu myndu Ítalir gera það líka. Það tókst hins vegar að afstýra mögulegri útgöngu Grikkja ýr myntsamtarfinu sumarið 2015 með samningum sem þóttu á þeim tíma niðurlægjandi fyrir Grikki. 

Úr fréttum Stöðvar 2 13. júlí 2015.