Lífið

Costco-gaurnum þykir jólagjöf Costco heldur nánasarleg

Jakob Bjarnar skrifar
Costco-gaurnum brá í brún þegar hann sá hvað starfsmenn þar fá í jólagjöf frá fyrirtækinu.
Costco-gaurnum brá í brún þegar hann sá hvað starfsmenn þar fá í jólagjöf frá fyrirtækinu.
Sigurður Sólmundarson múrari, sem betur er þekktur sem Costco-gaurinn, er ekki ánægður með Costco, aldrei þessu vant. Hann telur jólagjöf fyrirtækisins til starfsmanna sinna heldur nánasarlega.

„Costco-gaurinn segir: Skamm bara Costco og íhugar að breyta nafninu í Landsbanka- eða Bláa lóns-gaurinn,“ tilkynnir hann á Facebook-síðu sinni.

3.500 króna inneign sem rennur út um áramót

Vísir fjallaði um óhapp Sigurðar á dögunum, en hann lenti í árekstri og er margbrotinn, marinn og bólginn. Sigurður varð þekktur sem Costco-gaurinn í stærsta Facebook-hópi Íslands og þó víðar væri leitað – Keypt í Costco Ísl.- Myndir og verð. – en þar birti hann myndbandsupptökur og var jafnan býsna ánægður með verslunina og varninginn þar sem féll í góðan jarðveg í hópnum, svo mjög að nafngiftin Costco-gaurinn festist við Sigurð.

En, Sigurði brá í brún í gær þar sem hann lá á sínu sjúkrabeði og var að skoða umfjöllun um jólagjafir fyrirtækja til starfsmanna sinna. Þá komst hann að því, sér til mikillar hrellingar, að þetta eftirlætis fyrirtæki hans sker heldur við nögl í þeim efnum. Costco gefur starfsmönnum sínum 3.500 króna inneign í Costco en hún rennur út 31. janúar 2019. Þetta er sama upphæð og fyrirtækið gaf starfsmönnum sínum í jólagjöf í fyrra.

 

Trukkaverk-gaurinn

Sigurður er heldur svekktur með sína menn þá sem stjórna jólagjöfunum þar á bæ. Og lítur til þess í samanburði að starfsmenn Landsbankans fá gjafabréf í Líf og List sem nemur 50 þúsund krónum auk þess sem starfsmannafélagið leggur 10 þúsund króna gjafabréf í púkkið. Og starfsmenn Bláa lónsins fá svo 50 þúsund króna gjafabréf frá bankanum. Þetta þykir Sigurði almennilegt.

En, reyndar dregur til tíðinda á Facebook-vegg Costco-gaursins því þar tilkynnir Árni Sólon Steinarsson að allir starfsmenn Trukkaverk ehf. fengu „BÁÐIR bluetooth peltor að andvirði 80.000kr samkvæmt orðinu á götunni en fæst fyrir minna í KEMI.“ Þetta þykir Sigurði með miklum ágætum, vendir kvæði sínu í kross og tilkynnir að hann ætli nú að kalla sig Trukkaverk-gaurinn.


Tengdar fréttir

Jólaösin lagði kassana í Costco

Tölu­verð ör­tröð og ó­ró­leiki skapaðist í stór­versluninni Costco í Kaup­túni í gær þegar kassa­kerfi verslunarinnar hrundi í hálfa aðra klukku­stund.






Fleiri fréttir

Sjá meira


×