Landsliðsmenn fá meiri hvíld og Meistaradeildarliðum fækkar

Evrópska handboltasambandið hefur staðfest allsherjar breytingar á Evrópukeppnum félagsliða í handbolta og landsliðsgluggar munu færast til að tryggja betri hvíld bestu leikmanna heims.

Stjórn EHF kom saman í Frakklandi um helgina en úrslitaleikur EM kvenna fer fram í París seinna í dag.

Liðum í Meistaradeild Evrópu í handbolta verður fækkað úr 28 í 16 frá og með tímabilinu 2020-21. Spilaði verður í tveimur átta liða riðlum með hefðbundnu riðlafyrirkomulagi, allir spila við alla heima og heiman.

Liðin í 3.-6. sæti í riðlunum mætast í „umspili“ um sæti í átta liða úrslitum en efstu tvö liðin úr hvorum riðli fara beint þangað.

Undanúrslit og úrslit verða leikinn yfir eina Final4 helgi eins og verið hefur síðustu ár.

Keppnisfyrirkomulagið verður eins bæði fyrir karla og konur.

Evrópudeildin í handbolta

EHF bikarinn, næst sterkasta Evrópukeppnin, gengur í gegnum allsherjar breytingar og verður nú Evrópska handboltadeildin.

24 lið verða í riðlakeppninni í fjórum sex liða riðlum. Í núverandi fyrirkomulagi eru fjórir fjögurra liða riðla svo þar er töluverð fjölgun á.

Í fréttatilkynningu EHF kemur ekki fram hvernig forkeppnin fyrir riðlakeppnina verður eða hvaðan liðin sem fara í þessa keppni koma. Þar sem það er töluverð fækkun á liðum í Meistaradeildinni fer megnið af þeim liðum sem þar eru líklega inn í þessa keppni. 

Þriðja Evrópukeppnin, Áskorendabikar Evrópu, fær að taka nafn EHF bikarsins.

Leikir í Meistaradeildinni og nýju Evrópudeildinni verða fastir í miðri viku. Meistaradeildin á miðvikudögum og fimmtudögum, Evrópudeildin á þriðjudögum.

Þó það komi ekki fram í tilkynningunni þá þýðir þetta líklega að hefðbundnar deildir hafa sína leiki um helgar og skörun á deildarleikjum heima fyrir og Evrópuleikjum minnkar.

Engir 17. júní landsleikir í Höllinni

Þá hefur EHF gert breytingar á landsliðsgluggum til þess að gefa sterkustu leikmönnunum sem spila hvað mest meira frí.

Lengi hefur verið spilað um miðjan júní í undankeppnum stórmóta en sá gluggi verður færður til mánaðarmóta apríl og maí. Það þýðir að þegar tímabilin hjá félagsliðunum eru búin ættu leikmenn að geta farið í sumarfrí.

Þá verður Final4 helgin formlegur endir keppnistímabilsins í Evrópu frá 2021. Hún verður haldin í endan maí hjá kvennaliðum en í júní hjá körlunum. Allar deildir Evrópu munu vera skyldugar til þess að klára sín tímabil í það minnsta einni viku áður en Final4 helgarnar fara fram.