Innlent

Spyr hvaða for­dómum sá býr yfir sem skrifaði fyrstu fréttina um sela­hljóðið og Freyju

Sunna Kristín Hilmarsdóttir skrifar
Anna Kolbrún Árnadóttir, starfandi þingflokksformaður Miðflokksins, á leiðinni á fund þingflokksformanna á mánudag.
Anna Kolbrún Árnadóttir, starfandi þingflokksformaður Miðflokksins, á leiðinni á fund þingflokksformanna á mánudag. Vísir/Vilhelm

Anna Kolbrún Árnadóttir, þingmaður Miðflokksins og einn sexmenninganna á Klaustur bar, er í ítarlegu viðtali við Morgunblaðið í dag en hún hefur lítið sem ekkert tjáð sig við fjölmiðla frá því að byrjað var að fjalla um upptökurnar af barnum fyrir viku síðan.

Í viðtalinu er Anna Kolbrún meðal annars spurð út í hljóð sem heyrist á upptökunni þegar þingmennirnir ræða Freyju Haraldsdóttur sem barist hefur fyrir réttindum fatlaðra.

Á upptökunni heyrist hljóð sem líkist selahljóði og skömmu eftir það heyrast tveir þingmannanna segja „nei“ og Karl Gauti Hjaltason, nú óháður þingmaður, þá þingmaður Flokks fólksins, segir „Kræst, maður.“

Sigmundur Davíð Gunnlaugsson, formaður Miðflokksins, hefur sagt að um umhverfishljóð sé að ræða. Mögulega sé verið að færa stól eða þá að reiðhjól sé að bremsa fyrri utan. Sigmundur hefur sagt að hann kannist ekki við að neinn þingmannanna hafi vísvitandi gefið frá sér selahljóð og tekur Anna Kolbrún undir þetta.

„Hverjum datt í hug að velta fyrir sér hugtakinu selur og tengja það við Freyju Haraldsdóttur? Hvaða fordómum býr sá yfir sem skrifaði fyrstu fréttina um það?“ spyr hún.

Þá segist hún aðspurð ekki kannast við að hljóðið hafi komið úr barka neins þingmannanna.

Erfitt að viðurkenna fyrir sjálfri sér að hafa verið „konan sem þegir“

Anna Kolbrún segir að sér hafi liðið mjög illa vegna málsins síðustu daga. Hún geri sér grein fyrir að hún hafi látið orðræðuna viðgangast en hún geti þó ekki tekið ábyrgð á orðum annarra.

Hún segist hafa upplifað það þannig að hún hafi ítrekað reynt að skipta um umræðuefni en án árangurs. Hún kveðst oft hafa verið í þessum aðstæðum; þar sem karlar stjórna umræðunni og vilja ekki hleypa konum að.

„Það sem mér þykir kannski einna erfiðast að horfast í augu við er að ég hef svo margoft stappað stálinu í aðrar konur, sagt þeim að standa á sínu og láta ekki valta yfir sig. Ég á erfitt með að viðurkenna það fyrir sjálfri mér að ég hafi ekki gert það þetta kvöld. Að hafa verið þessi kona sem ég er alltaf að segja öðrum konum að vera ekki. Konan sem þegir.“

Anna Kolbrún segist jafnframt aðspurð ekki upplifa það að baktal og fúkyrði séu hluti af daglegum störfum þingsins. Þá sé það ekki daglegt orðfæri þeirra þingmanna sem sátu með henni á Klaustri að kalla konur kuntur og tíkur.

Í viðtalinu greinir Anna Kolbrún svo frá því að hún hafi greinst með krabbamein í brjósti árið 2011. Það hefur nú dreift sér um líkamann og er komið í kringum hjartað, í eitla, kviðarhol og lífhimnu.

Anna Kolbrún Árnadóttir og Sigmundur Davíð Gunnlaugsson verða gestir í Bítinu á Bylgjunni klukkan 8:05 núna á eftir.


Tengdar fréttir

Tilkynna notkun Önnu Kolbrúnar á starfsheitinu þroskaþjálfi til Landlæknis

Þroskaþjálfafélag Íslands hefur tilkynnt notkun Önnu Kolbrúnar Árnadóttur, þingmanns Miðflokksins, á starfsheitinu þroskaþjálfi til Landlæknis. Í æviágripi hennar á vef Alþingis stóð að hún hafi starfað sem þroskaþjálfi en ágripunu var breytt í dag. Orðið þroskaþjálfi kemur ekki lengur fyrir í ágripinu



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.