Stjörnuspá Siggu Kling – Bogmaðurinn: Mikið meira um ferðalög en þú býst við

Elsku Bogmaðurinn minn, þú átt það til með að gera allt of miklar kröfur til þín, vertu meiri vinur þinn því þú þarft alltaf að hanga með sjálfum þér, þú ert bæði einfari en samt félagslynd persóna, en þér finnst nefnilega gott að finnast þú vel liðinn og þú átt frábæra vini.

Stundum hverfurðu dögum og mánuðum saman og enginn skilur hvar þú ert, en svo geturðu verið jafn sýnilegur og Esjan og er líka jafn breytilegur og Esjan, aldrei eins. Til þess að næra sjálfan þig er svo mikilvægt þú búir þar sem þér finnst öryggi í kringum þig og þú getir fest rætur því þá virkar þinn öflugi hugur svo miklu betur og þér verða allir vegir færir. Það verður mikið meira um ferðalög en þú býst við á næstu mánuðum, bæði löng og stutt.

Þú býrð oft til þínar eigin reglur og getur verið ósveigjanlegur þegar aðrir vilja breyta þeim, sýndu lítillæti og auðmýkt og þó þú hafir rétt fyrir þér í þeim reglum sem þú setur skiptir það engu máli, því jafnvægi finnst ekki fyrr en þú slakar svolítið á kröfum þínum.

Það er mikill magnari yfir ástamálunum hjá þér, þú átt það á hættu að ástin geti sprungið ef hún er ekki góð eða ný ást mæti, því þú ert á tímabili að mynda fjölskyldu, bæta þinn hag og byggja hreiður. Ástin býr í öllun hornum og frjósemi býr í þessum tíma, þetta verður ekkert smá skemmtilegt.

Knús og kossar, þín Sigga Kling

Frægir Bogmenn: Ingvar E. Sigurðsson leikari, Björgvin Franz Gíslason leikari, Edda Heiðrún Backman leikkona, Regína Ósk Óskarsdóttir söngkona, Sigrún í Gyðja Collection, Steindi, Bryndís Ásmundsdóttir, leik- og söngkona, Jóhanna Vilhjálmsdóttir, fjallkona og leikkona, Logi Bergmann Eiðsson sjónvarpsmaður, Jói á Fabrikkunni, Sigga Dögg kynfræðingur, Hemmi, hársnillingur á Módus, Lovísa, hönnuður hjá Kjólar og konfekt, Kjartan Kjartansson athafnamaður.