Viðtækt samstarf gegn kynlífsmansali

Samkvæmt lögreglunni eru 50 til 60 starfandi vændiskonur á hverju tímabili í Reykjavík og nýta þær sér hótel og gistiheimili undir starfsemi sína. Ofbeldisvarnarnefnd Reykjavíkurborgar vill koma á samvinnu lögreglu, borgarinnar, hótela og gistihúsa til að reyna að sporna við vændi og kynlífsmansali í borginni.

Ofbeldisvarnarnefnd Reykavíkurborgar hélt vinnustofu í dag með lögreglunni og eigendum hótela og gistihúsa. Kynnt var verkefni sænsku góðgerðarsamtakanna Real stars gegn kynlífsmansali. Samtökin hafa meðal annars unnið náið með hótelum og öðrum aðilum í ferðamannaiðnaðinum. Þau fyrirtæki eru í aukinni hættu á að tengjast mansali. Heiða Björg Hilmisdóttir, formaður nefndarinnar, vill koma á viðtæku samstarfi.

„Reykajvíkurborg finnst mikilvægt að taka þetta skref og sýna að við viljum vera borg þar sem að vændi viðgengst ekki og fólk er ekki selt og keypt eins og hver annar varningur. Svo bara þarf að skoða það hvort að þarna sé kominn grundvöllur fyrir auknu samstarfi til þess að koma í veg fyrir það að hér viðgangist þessi starfsemi. Mikið af þessu er auðvitað á hótelum og gististöðum af því að þetta er skipulögð glæpastarfsemi," segir Heiða. 



Kynlífsmansal á sér stað á Íslandi



Hvergi í heiminum er fjöldi kynlífsþræla á mann meiri en í Evrópu og eru 25 prósent af brotaþolum undir 18 ára aldri. Lögreglan segir vanta vitundarvakningu og aukna meðvitund í samfélaginu því enginn vafi leiki á að kynlífsmansal eigi sér stað hér á landi. Ákjósanlegt sé að horfa til Sviþjóðar.

„Svíar hafa raunverulega verið með mjög sterka vitundarvakningu. Þar sem fyrirtækin og hótelkeðjurnar hafa stígið inn og sett sér ákveðnar verklagsreglur og hafa kynnt þeim sem þangað koma að hótelið sætti sig ekki við að það sé notað í þessum tilgangi. Þeir eru með mjög skíra samfélagsvitund í því," segir Karl Steinar  Valsson, yfirlögregluþjónn og Guðmundur Birgisson hótelstjóri bætir við: „Maður hefur svosem heyrt af þessu í gegnum tíðina að þetta hafi komið upp á hótelum. þetta eru viðkvæm mál en núna væri gott skref að fara að vinna að vissum vinnureglum sem fólk getur þá nýtt sér," segir hann.