Erlent

Svarar Trump með frásögn af nauðgun, skömm og þöggun

Kristín Ólafsdóttir skrifar
Padma Lakshmi er líklega þekktust fyrir að stýra sjónvarpsþáttunum Top Chef.
Padma Lakshmi er líklega þekktust fyrir að stýra sjónvarpsþáttunum Top Chef. Vísir/getty
Bandaríska sjónvarpskonan Padma Lakshmi greinir frá því hvers vegna hún tilkynnti ekki um það þegar henni var nauðgað á unglingsárunum í pistli sem birtist í dagblaðinu New York Times í morgun. Hún segir ásakanir á hendur Brett Kavanaugh, hæstaréttardómaraefnis Donalds Trump Bandaríkjaforseta, vera kveikjuna að skrifunum.

Lakshmi er 48 ára gömul og segir í pistlinum að þáverandi kærasti hafi nauðgað henni fyrir rúmum þrjátíu árum síðan. Í kjölfarið hafi henni fundist sem nauðgunin væri henni að kenna og þá segist hún skilja hvers vegna konur segi ekki frá kynferðisofbeldi sem þær eru beittar.

„Þetta verður bara vont í smá stund“

Lakshmi var 16 ára og kærastinn 23 ára þegar þau byrjuðu að hittast. Hún segir að kvöldið sem hann nauðgaði sér hafi hún gist í íbúð hans, sofnað og hrokkið upp með hann ofan á sér.

„Ég spurði: „Hvað ertu að gera?“ Hann sagði: „Þetta verður bara vont í smá stund.“ „Gerðu það, ekki gera þetta,“ öskraði ég. […] Eftir að hann hafði lokið sér af sagði hann: „Ég hélt það yrði ekki eins sárt ef þú værir sofandi“.“

Lakshmi sagði aldrei neinum frá atvikinu, hvorki fjölskyldu sinni né lögreglu, þar sem hún byrjaði fljótlega að finna fyrir þrúgandi skömm. Lakshmi setur tilfinningar sínar í samhengi við ásakanir Christine Blasey Ford og Deboruh Ramirez á hendur Brett Kavanaugh, og þá enn fremur viðbrögð Donalds Trumps Bandaríkjaforseta við ásökununum.

Lakshmi vísar sérstaklega í tíst Trumps sem birt var á föstudag. Þar fullyrti forsetinn að Ford hefði án efa tilkynnt árás Kavanaugh til lögreglu, hefði ofbeldið verið jafnslæmt og hún lýsir því. Þá krafði Trump hana um gögn málsins. Myllumerkinu #WhyIDidntReport eða „þess vegna lagði ég ekki fram kæru“ var hleypt af stokkunum í kjölfar ummæla forsetans, líkt og greint var frá á Vísi um helgina.

„Ég skil hvers vegna konurnar sögðu engum frá þessu í svona mörg ár, án þess að tilkynna neitt til lögreglu. Ég gerði hið sama um margra ára skeið,“ segir Lakshmi og svarar þar áðurnefndu tísti forsetans.

Bæði Ford og Ramirez saka Kavanaugh um að hafa brotið á sér á níunda áratug síðustu aldar. Ford og Kavanaugh munu bæði bera vitni á fundi dómsmálanefndar öldungadeildar Bandaríkjaþings á morgun vegna málsins. Kavanaugh segir ásakanir beggja kvenna rógburð.


Tengdar fréttir

Réðu konu til að ræða við meint fórnarlamb Kavanaugh

Allir ellefu þingmenn Repúblikanaflokksins í dómsmálanefndinni eru eldri karlar og hafa þeir óttast hvernig það myndi líta út að þeir myndu spyrja hana út í ásakanir hennar og óttast að tapa atkvæðum kvenna þegar svo stutt er í þingkosningar.

Sífellt fleiri trúa að Kavanaugh sé sekur um kynferðisbrot

Kannanir sýna að sífellt fleiri kjósendur í Bandaríkjunum snúast gegn Brett Kavanaugh, sem er tilnefndur sem hæstaréttadómari, en hann er sakaður um kynferðisbrot á yngri árum. Hann segist þó alls ekki ætla að draga sig í hlé, enda sé ekkert hæft í þeim ásökunum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.